Shillong, K’lyngkot, 09: Ki runar ki bym lah ban ithuh durkhmat ki la kawang maw ïa ki jaka sah jong ki shipai BSF kaba don ha Mawpat, Shillong.
Ha ka ejahar ba la ujor da u Sanjiv Kumar Jha, u la pyntip kane ka la jia ha ka 5 tarik mynta u bnai ha ka por kumba 7:30 baje janmiet. Ha kane ka jingjia, ki jingkhang iit ki la pait na ka jingshah kawang maw.
Ha kawei pat ka jingjia, u Asharphi Ray u la ujor da ka ejahar sha ki Pulit ba ha ka 7 tarik mynta u bnai ki runar ki bym lah ban ithuh durkhmat ki la prongtuh hapoh ka iingsah jong u ha 29 Cantonment, Goenka Market, Shillong ha kaba ki la rong tuh ïa ki jingdeng ksiar bad ïa ka pisa kaba T. 17,000 hajar.
Related Posts
U Party Commander jong ka F-Company, 4th Battalion, BSF, BOP Rongtilla West Jaiñtia Hills District u la ujor ba ha ka 7 tarik mynta u bnai ha ka por kumba 12.30 baje ki shipai BSF ki la lap 18 tylli ki masi ba la shu ieh kumto hajan u mawpud BP No. 1283/4-S, West Jaiñtia Hills.
U ASI V Singh jong ka of G-Coy, 4th Bn., BSF, SP-Tilla BOP (WJH) u la phah ka jingujor ba ha ka 3 tarik mynta u bnai ha ka por kumba 10 baje mynmiet ki shipai BSF ki la lap ïa 4 tylli ki masi kiba la ieh bad kiba khlem don kiba wan kam najan ka BP No. 1288/MP (WJH).
U Vice Principal jong ka Industrial Traiñing Institute, Khliehtyrshi, West Jaiñtia Hills District ha ka jingujor ejahar u la pyntip ba ha ka 6 tarik mynta u bnai u la lap ba ki runar bym lah ban tip ki la rong tuh lai tylli ki CPU, lai tylli ki Keyboard, lai tylli ki Monitor, lai tylli ki Battery bad lai tylli ki taïar bad kawei ka tyre rim.
Kawei ka longkmie kaba sah hapoh ka East Garo Hills ka la ujor da ka ejahar ban pyntip ba ha ka 25 tarik, Nohprah, 2024 ha ka por 4:00 baje mynstep uwei u briew uba kyrteng u Jelsing Ch Marak u la tied ïa ka da u dieng ha Williamnagar, East Garo Hills bad ha kane ka jingjia ka longkmie ka la mynsaw.