Kawang ktieh katba mon, ka NPP kan tur shaphrang ban pynroi pynpar ban myntoi ki paidbah: Dy CM

Nongpoh, Rymphang 05 : U President ka National Peoples’ Party (NPP) ha Meghalaya bad Symbud Myntri Rangbah ka Jylla Bah Prestone Tynsong, ula ong ba ka NPP kam don por ban jubab ïa ki jingkynnoh ba laiphew jait jong ki Liang Pyrshah ne kynhun bapher bapher namar ka bunkam ban trei ha ka ban wanrah ïa ki kam pynroi pynpar sha baroh ki shnong ki thaw bad kyntiew ïa ka bha ka miat u paidbah bad ka Jylla.
U Bah Prestone ula kynthoh ïa kane ha ka rynsan ïalap elekshon mynta ka sngi Balang ha Umwang Them, Ri-Bhoi District, ban pan jingkyrshan ïa ka kyrtong jong ka Party bad MDC barim ka KHADC Kong Rona Khymdeit kaba ïakhun na Nongpoh Constituency.
U Bah Prestone ula ong ba ka Sorkar ba ïalam ka NPP kala shah kawang ktieh na baroh ki liang namar ka dei ka Sorkar kaba treikam bad kaba shakri hok ia u paidbah bad ia ka Jylla.“Phi ki paidbah wat long kiba ngeit biej. Ki kynnoh ïa ka NPP ba ka bamsap, ki kynnoh ba dei ka party High Level hynrei kim nud pat ban ujor sha ka aiñ namar kim don ïa ki sakhi ban pynshisha. Balei ki tieng ban ujor sha ki bor ka Aiñ lada ki ne ki jingkynnoh ki dei kiba shisha. Kam don jingmut ban shu kynnoh bad shu heh tang ka tyngam” ula ong.
U Bah Prestone ula ong ba ka Sorkar ba ïalam ka NPP ha kine ki 8 snem bala leit, kala wanrah ïa ki Policy treikam bapher bapher kiba pynmyntoi ïa man uwei pa uwei u nongshong shnong ka Jylla kynthup naduh ki nongrep, ki nongbylla sngi, ki nongñiah kali bad ter ter.
U pyntip ba dang shen, ka Kynhun Myntri ka Sorkar kala rai ruh ban thaw noh ïa ka Apex Cooperative Society ka ban kdup bad kyrshan ïa baroh ki Cooperative Society bad ki Self Help Group, ki Village Organisation lyngba ka jingairam ai shah ba kin lah ban sengkam ne pynheh ïa ki kam ba ki trei khlem da bunkam shuh ban leit tynruh ïa ki bank. U ong ba kane kan ïarap ruh ha ka liang ka ïohkam ïohjam ïa ki nongshong shnong ha kylleng ki jaka jong ka Jylla.
Haba pan jingkyrshan ïa ka kyrtong, u Bah Prestone ula ong “Watla ka kong Rona Khymdeit kam pat jop ïa ka elekshon MDC, hynrei kala trei shitom bha ban pynïajan ïa u paidbah bad ka Sorkar ban ïoh ïa ki jingïarap bad ki kam pynroi. Katno tam kan long ka jingmyntoi ïa ki paidbah lada ka jop kum ka MDC ka NPP ha kane ka elekshon ban wan”.
U Symbud Myntri Rangbah ula kren ruh halor ka surok hapoh ka thaiñ bad pyntip ba ka Sorkar kala dep ban mang ïa ka song pisa bad kala dep ai ruh ïa ka work order ban shna noh ïa ka surok Nongpoh-Umden sha Sonapur kaba kot palat T.100 klur. U pyntip ba mar ïa kut kane ka elekshon, ka tnad PWD kan sa sdang pyntrei noh shaid shaid ïa kane ka surok na ka bynta ka jingmyntoi u paidbah ka thaiñ.
Na ka liang ka Kong Rona Khymdeit, haba pan jingkyrshan na ki paidbah, kala ïathuh, ba ka jied jong ka ïa ka NPP ka dei kaba la pynshong nongrim na ka jingtreikam jong kane ka party bad ka jinglah ban wanrah ïa ki jingkylla hapoh ka Jylla nalor ki kam pynroi kiba la rung mynta sha man ki kyndong kynshrot jong ka Jylla.
Ha kane ka sngi, ki Nongïalam ka NPP ba kynthup ïa u Nongaiktien Bah HM Shangpiang, u President ka NPP na Ri-Bhoi Bah Clement Mawlong nalor kiwei kiwei, kila ïahiar ruh sha ka shnong Marmain ban pan jingkyrshan ïa ka Kong Rona Khymdeit ba kan ïoh kheit ïa u soh ka jingjop ha kane ka elekshon ban wan.