Kat nang kiew stet ka juk ki kor ki bor katta nang jur ka jingsyier ki kmie ki kpa ïa la ki khun
![](https://mawphor.com/wp-content/uploads/2022/02/editorial.jpg)
Ngi im ha ki sngi kiba ka jingstad ka la roi stet shisha bad ngim lah ban len ïa kawei ka jingshisha ba ka jingstad jong ki khun kiba dang rit ka la beh tam ïa ka jingstad jong ki kmie ki kpa khamtam ha kaba ïadei bad ki jingnang jingtip bad jingshemphang ba ïadei bad ka teknoloji ne ki media. Ki Mobile bad Computer ki dei kawei na ki nuksa kaba suk eh ban ïohi kumno ba ki riew rangbah ki shem ba kam long kaba suk ban pyndonkam ïa ki, hynrei ki khynnah wat ki bym pat leit skul ruh kim shem jingeh ei ei ban pyndonkam ïa ki.
Hynrei kine ki jingstad jong kane ka juk ki la beh pass noh wat ïa ka burom ka akor kaba dei ka bynta kaba kongsan eh ha ka jingim jong ki briew. Ngi ïohi ïa ka jinghiar jong ka akor ka burom katba ki sngi ki nangïaid. Hynrei ka la long kaba donkam ban kynmaw ba lada ki kmie ki kpa bad ki longiing kim shim khia ïa kane ka bynta ban ai ïa ka por bad hikai ïa ki khun ïa ka akor ka burom, kin ym lah ban ïoh jinghikai nabar ha kaba ïadei bad kane, namar ka long kaba shisha ba ka jingbha ka sdang na la rympei ïing.
Kawei ka phang kaba ktah ïa ki longiing longsem ka dei ka jinghiar jong ka jingshakri Blei, hynrei ka jngkiew jong ka jingiabeh ïa ka spah pyrthei, ka burom pyrthei bad ka bor pyrthei. Kane ka juk ka don ha ka khim khait kaba khraw ha kaba baroh baroh la ïakwah ban ïadon lut ïa kaba kiwei ruh ki don bad ruh ban kham don khamtam ban ïa kiwei. Ka jingbunkam ha kaba ïabeh ïa kane ka spah pyrthei ka ktah pat ïa ka por ban pyrkhat na ka bynta ka akor ka burom ha ka imlang sahlang. Kum ki kmie ki kpa bunsien ka la long pynban ka jingïalam bakla ïa ki khun ki kti da kaba ki pyrkhat da kaba ailut ïa baroh kaba ki khun ki kwah kan pynlong tip sngi ïa ki. Hynrei kane ka don pynban ha ka jingma kaba khraw ïa ka lawei ym tang ka jong ki hynrei ka imlang sahlang hi baroh kawei. Jan baroh ki longiing ki ud ïa ka jinglong ki khynnah kane ka juk mynta ba ki long kiba saitlah bad kiba ym niew kor shuh ïa ki kmie ki kpa.
Hooid shisha kane ka juk kam dei kaba suk bad wat ki khun jong ki kmie ki kpa kiba pynlut por ban shakri Blei ruh kim don jingpher na ki khun jong kito kiba lap miet tang bad ka pyrthei. Wat kito ki kmie ki kpa kiba smat bad beh bha sha ka kam shakri Blei ruh la ju ïoh sngew bad ki ud shisha ïa ka jinglong jingman jong ki khun ha kine ki sngi ba mynta. Kane ka dei kata ka juk kaba ka por hi ka ïalam sha ka jingim kaba eh, ym lah ban len ba kane ka jia ryngkat jong ka jingroi ki jingnang jingstad teknoloji bad social media. Kumta kam dei tang kito kiba im riew pyrthei hynrei wat kiba im riewblei ruh ki kynduh marsiang. Hato kadei shisha mo ba kidei kita ki sngi kiba khatduh kumba ka Bible ka kren.
Kaei kaba lah ban ïohi, ka long ba kane ka por ka la dawa shisha ïa kiei kiei kiba long kham tam ne extra, ba ka long kaba kum ki kmie ki kpa ki donkam ban phikir bha ïa la ka jong ka longiing khnang ba yn lah ban tei ïa ka long ryngieng jong ki khun ki kti ha kane ka imlang sahlang. Shisha ha kine ki sngi ki don bun ki kmie ki kpa kiba shim khia ban phikir ïa la ki jong ki khun ki kti bad haduh ba ki khun ki pule haduh Class 10, ruh ki dang leit on bad leit shaw skul ïa ki, kawei ka long namar ba ki ima ïa kane ka pyrthei kaba dap bad ker tawiar da ki jingsniew suda namar tang shu bakla tiak ki lah ban mih shibun ki jingeh kiba lah ban long ba yn ym lah ban khyllie pat ïa ka jingduhnong na ki.
Hynrei ka long kaba shisha kum ki briew ngi lah ban leh ïa kaei kaba bha tam na ka bynta la ka iing ka sem bad ka longiing- Hynrei katta ruh ka lawei ka long ka bymthikna. Wat la ngim lah ban tip ïa kei kaban sa jia hadien habud hynrei ka long kaba donkam ban pyrshang ïa kaei kaei kaba bha bad kaba ngim lah don kam ban shu shaniah ha ka bor jong u nongthaw. Hynrei lada ngim shym la shim khia ne leh ei ei lada wan jia kaei kaei kaba sngewsih ngin sa babe kylla ma ngi hi. Namar kata ngi donkam ban pyrshang ïa kiei kiei kiba bha na ka rympei ïing hi bad khmih lynti ha kaba shabar kan biang.