Shillong, Rymphang 05 : Ka nongïalam jong ka National People’s Party (NPP) kaba dei ruh ka Myntri jong ka tnad ka Koit ka Khiah ka sorkar jylla, Dr. M Ampareen Lyngdoh ha ka sngi Balang ka la pynpaw ïa ka jingsngewskhem ba ka party kan ïoh ïa ka jingjop kaba donburom ha baroh ar tylli ki Autonomous District Councils (ADCs) kata ha KHADC bad kumjuh ha JHADC ha kane ka elekshon MDC kaban sa long shen mynta u bnai.
Haba kren bad ki lad pathai khubor, ka Myntri ka la ong ba ka party ka la pynkhreh bha ïalade na ka bynta kane ka elekshon ha KHADC bad JHADC kaba la buh ban long ha ka 21tarik Rymphang mynta u snem.
“Ngi dei ban jop namar baroh ngi la trei shitom bad ban pynkynmaw ruh ba baroh ngi don hangne namar ngi don ïa ka thong bad kata ka long ban shakri ïa ki paidbah ka Meghalaya katkum ka bor bad ka jinglah jongngi,” ka la bynrap biang.
Nangta ka ong ruh ba ka don ka jingsngew ba kane ka elekshon MDC mynta ka kynti ka kham long kaba kham pher na ki elekshon kiba long ha ki por kham mynshwa ha ka jylla. Ka Myntri ka ong ruh ba ka party ka don ïa ki kyrtong kiba kynsai bad kumta khlem artatien kin ïoh kham bun ki MDC kiban poi sha ka thong da ka jingieid bad ka jingshaniah na ki paidbah.
Haba jubab halor ka jingkam jong kiwei pat ki party, kane ka heh NPP ka la ong ba ka elekshon MDC kan pher bha lada nujor bad ka elekshon MP kaba dang shu lah.
“Kane ka dei kata ka riti synshar paidbah ha kaba man ki party ki kiew bad ka party jongnga ruh ka jop. Kumta phin ym lah ban leh ei ei ïa kane,” ka la ong.
Ka ong ruh ba ym slem ba kin sa ïohi ïa ka result jong kiba jop bad kiba rem, hynrei ka la pynpaw ia ka jingsngewskhem ba kum ka party kin sa ïoh ïa ka jingjop kaban ïahap bad ka jingdonkam.
Haba jubab halor ka jingkylli la mynta ka kynti ka result ha ka elekshon MDC kan ym don kano kano ka party kaban ïoh bun, kane ka nongïalam NPP ka la ong ba lada peit ïa ka result jong ki elekshon bapher bapher ha ka jylla ki don la ki jong ki jong naduh ba ïoh la ka jong ka jylla.
Tangba ka ong pat ba ki sngewkmen ban ong ba dei tang ka NPP mynta kaba don bun ngut tam ki nongmihkhmat bad kaba la biang ban ïalam hi ïa ka sorkar.
Nangta ka kyntu ruh ïa ki paidbah ka jylla ba ki dei ban long kiba shemphang bad pyrkhat bunsien ha shwa ba kin leit sha ki jaka thep vote.
