Shillong, Lber 22: U Myntri ka tnad sam um bam um dih ka jylla u Marcuise N. Marak u la ïa shim bynta ha ka jingpynlong ka tnad pynneh pynsah ïa ka khyndew ka um ka wah kaba la pynlong ha Raja Apal UP School Playground, North Garo Hills ha ka sien kaba ar ïa ka jingpynshai paidbah ïa ka Pradhan Mantri Krishi Sinchayee Yojana (PMKSY).
U Myntri u la ong ba kane ka jinghikai ka long ban pynsngew ïa ka jingdonkam ban pynneh pynsah ïa ki tyllong um, ban kyntiew ïa ka rep ka riang, ban kyntiew ïa ka ïoh ka kot ha ki nongrep ha ka jylla. U Myntri u la ong ba ka long kaei kaei kaba donkam ban pynneh pynsah ïa ki um ki wah bad la pyntip ruh ïa ki lad jingïada kiba ka sorkar ka la shim bad donkam ban pynkhreh ïa ka plan ban pynneh pynsah ïa ki tyllong.
Ban leh ïa kane ban pynneh pynsah ïa ki um ki wah don kam ïa ka jingïatreilang da baroh namar kane ka long ban ïada bad ban kyntiew ïa ka ïoh ka kot jong ki paidbah nongshong shnong.
U Dr. Joram Beda, Commissioner bad Secretary ka tnad Soil bad Water Conservation Department, u la pynshai bniah ïa ka jingdonkam bad ïa ka jingtrei kam jong kane ka jingpynneh pynsah ïa ki tyllong um bad kane kan ïarap ban pynïoh ïa ki tyllong um kiba khuid, kane ka jingtyrkhong ki tyllong um dei na ka rep syrti khamtam ha ki lum Garo Hills.
Kane ka Pradhan Mantri Krishi Sinchayee Yojana – Watershed Development Component 2.0 (PMKSY-WDC 2.0) ka treikam bha namar ka don ka jingïadei bad ki nongrep bad kawei ka skhim ban pynneh ïa ki tyllong um hap ban pynmyntoi ïa ki 1000 ngut ki nongrep bad nang don ka jingïatrei lang bad ki 1,188 tylli ki seng treilang bad haduh mynta la lah ban shna haduh 2,078 tylli ki nan um.
Ïa mynta la ïoh jingkheiñ ba ki don hapdeng 30-40% ki tyllong kiba don ha ka jingma, ïa mynta ki don 1,200 tylli ki kynhun kiba ïa treilang ha kaba ki donkam ïa ka bai seng T.50,000/- tyngka ban kyntiew ïa ka ïoh ka kot ka jong ki.
Ha kane ka sngi nalor u Myntri sorkar kiwei kiba ïadonlang ki long u Timothy Shira, Deputy Speaker; Rupert Momin, MLA ka 57th Kharkutta; u Marthon J. Sangma, MLA ka 38th Mendipathar; bad u Ponseng Marak, MLA ka Banjengdoba bad ki heh sorkar kila don lang ha kane ka sngi.
