Shillong, Rymphang 06 : U MLA ka BJP na Pynthorumkhrah ba dei ruh u Myntri barim ka sorkar jylla, Bah AL Hek ha ka sngi Nyngkong u la ong ba kumba ha Delhi ka don ka sorkar Modi kumta ruh kan long ha Meghalaya bad ma u pat un ïalam kum u Myntri Rangbah ka jylla.
Haba kren bad ki lad pathai khubor hadien ba la dep ban thep kyrteng, u Bah AL Hek u la ong ba u don ka jingkyrmen kaba skhem ba hadien ka elekshon kan don noh ka sorkar ba ar engine ha Delhi bad ha Meghalaya.
Ïa u Bah AL Hek la synran lang ruh ha kane ka sngi da u Myntri ka tnad Earth Sciences ka sorkar pdeng, u Jitendra Singh bad ruh da ki hajar ngut ki paidbah nongkyrshan.
Hadien kane, na ka liang u Bah Sanbor Shullai ba dei ruh u kyrtong ka BJP na Shillong South constituency u la ong ba u Bah AL Hek um lah satia ban shu kam ïa ka shuki Myntri Rangbah namar ïa ka jingjied ïa u nongïalam kadei ban rai beit na ki bor bahalor jong ka party.
“U Bah Hek um lah satia ban put turoi dalade ïalade kum u Myntri Rangbah lada ka BJP ka jop namar ka BJP kadei ka National Party bad kam dei satia ka party jong u Bah Hek marwei,” u la ong haba kren bad ki lad pathai khubor hadien ba la dep ban thep kyrteng.
Hynrei haba jubab ïa ka jingkylli, u Bah Sanbor u ong ba ka rai hi kadei na Delhi bad lada ka wan ka jingbthah nangtei kin pdiang beit. “Lada na Delhi ki ibit ïanga ban long Myntri Rangbah nga ruh nga kloi,” u la bynrap biang.
Shwa kane, na ka liang u Bah Sanbor u la ong ruh ba ka ju dei ka rukom ba ki party ki ju beiñ ïa ka BJP ha shwa ka elekshon hynrei ynda la dep ka elekshon pat ki leit ban khroh ïa ka BJP ban thaw sorkar namar ki donkam ïa ka dud bad ka ngap na ka sorkar pdeng.
Katba na ka liang u Bah Hek haba pynshai halor ka jingmih jong u pyrsa jong u, u Bah Rocky Hek ban ïakhun pyrshah ïa u ha kane ka elekshon u la kam ba kan ym don satia kano kano ka jingktah namar bun ki bahaiing ha sem ki la mih ban kyrshan lang ïa u. U da bynrap ruh ba kane kadei ka sien kaba hynriew ba un ïakhun ïa ka elekshon MLA kaba u khmih lynti ba kan dei ruh ka jingehrngiew ba un jop biang.
Ha kane ka sngi, baroh arngut, kata ïa u Bah AL Hek kumjuh ïa u Bah Sanbor Shullai la wan ban synran da ki hajar ngut ki paidbah ban wan thep kyrteng sha ophis u Deputy Commissioner ka East Khasi Hills.
