Ym dei ba ïashah ne kyrshan sorkar hynrei ngin ïakren halor ki jingshisha bad kata ka long ba kane ka sorkar MDA wat hapdeng ki jingshah kynnoh ba laiphewjait laiphew rukom khamtam kata ka jingkynnoh bamsap kaba ym don pat ba lah ban pynshisha ne ujor sha ki bor ka aiñ hangno kata ka jingbamsap jong ka sorkar, ka dei pat ka sorkar kaba trei da ki kam bad lah ban ong ym pat don sorkar kaba trei kum kane lada ïanujor naduh mynshwa haduh mynta.
Kawei na ki kam ba kane ka sorkar kan pyni sha ki paidbah ka dei ka jingbuh ïa u maw Nongrim lashai ka sngi ha Khlieh ïew, ïewduh na ka bynta ban pyntrei ïa ka project ba 14 klur tyngka ban pynbha bad pynitynnad nadong shadong ïa ka ïewduh.
Ym tang kane hynrei lada phai sha baroh ki liang naduh ki surok, ki hospital, ki kam pynroi pynpar ha sor bad ha nongkyndong. Lada ngi phai sha ki surok, ngim lah ban len kat shaba ngi leit la ïoh beit ïa ki surok kiba bha lait noh hangne hangtai ki dang don hi kiba sniew namar ka jingbym pat ïoh lad ban sdang shna hynrei kitei ruh ki dei kiba la don ha ka jingmang jong ka sorkar. Lada ngi phai sha kata ka Nongbah Shillong kaba thymmai ngi la ïohi ba dei ha kane ka sorkar kaba mynta ba la wan shisha ka jingkylla bad i don ka jingkyrmen ba ym slem shuh yn sa ïohi ïa kata ka nongbah Shillong kaba thymmai.
Kaba i tynnad ka long ba haba don kano kano ka saw ka sian ha ka jylla u Myntri Rangbah, ki Symbud Myntri Rangbah bad ki Myntri Sorkar ki ïatrei lang bad ki Ophisar naduh ki ophisar kiba peit ia ka shongsuk shongsaiñ haduh ki ophisar kiba peit ïa ka roi ka par. Kane keiñ ka dei kawei kaba pynlong ïa ka kam ba kan ïaid sted namar ym don jingtuklar tang na uwei ne ar ngut ki Myntri Sorkar ne wat na u Myntri Rangbah ne ki Symbud Myntri Rangbah ruh. Ki shaniah ruh ha ki Ophisar haba ki la pynkhamti ïa kano kano ka kam ba kin trei.
Ym tang halor kane hynrei la ïohi ba kane ka sorkar ka la lah ruh ban wanrah ïa shibun bah ki jingkylla. Lada phai sha ki surok ki lynti ki syngkieng, kiba bun hi ki jaka ki la ïoh ïa ki surok kiba bha. Lada phai sha ka pule puthi ka sorkar ka ïaleh katba lah ban pynbha ïaki skul sha ki thaiñ nongkyndong ba kin ïa ryngkat kyrdan kum ki skul hangne ha sor. Lada phai sha ka koit ka khiah ka sorkar halor kane ruh ka shim khia bha ym tang ba ka peit tang ïa ki hospital ne jaka sumar jongka sorkar hynrei khamtam ka jingïarap ïa ki hospital kiba la rim kiba don ha ka jylla mar arklur tyngka. Kane ka la ïarap bha ïa ki ba kin ïoh thied ïaki tiar ai jingsumar kiba biang kat kum kane ka juk ba mynta. Nalor kata lada phai sha ka rep ka riang ruh ka sorkar ka shim khia bha ban ïarap ïaki paid nongrep ha kiba bun ki liang. Na ka bynta kito kiba seng kam seng jam lajong ruh ka sorkar ka pynshlur bha ïa ki da kaba ai jingïarap ïa ki kum ka subsidy bad grant.
Lada phai sha ka New Shillong Township ruh la ïohi ba dang mynta khyndiat snem ba la don ka jingkylla bad la don ka jingkhmih lynti ban ïohi shisha ïa kata ka New Shillong hapoh ki khyndiat snem ban wan namar ïa ki ophis sorkar la tei lut sha katei ka jaka, ïa ka Secretariat ruh la sdang ban tei, ïa ka Assembly ruh la jan dep bad bun kiwei kiwei kiba ym lah ban ñiew tang kiba kane ka sorkar ka la leh. Kumta haba ka sorkar ka trei ki paidbah ruh ki dei ban ïa ai mynsiem ym ban shu kynnoh khlem ki sakhi sabut ne ki nongrim kiba biang. Hynrei lada lap ba ka sorkar ka leh bakla ryngkat ki sabut satar kiba biang dei ban jyrwait shkor beit da kaba ujor sha kibor ka aiñ ba kin leh ïa kaba donkam kat kum ka aiñ. Ban shu kynnoh bamsap khlem ki sabut kiba biang ka long tang ka jingkynnoh ban pynthame bad pynbiej ïa ki paidbah khamtam ha ka por election. Kumta ki paidbah ruh ki dei ban peit da la ki jong ki khmat aiu kane ka sorkar ka leh shisha hapoh kine ki hynriew hynniew snem ba ka don ha ka bor namar ym lah ban len ka la ïaleh katba lah ban pynkylla ïa ka jylla ban ïabeh sha kata ka thong ban ïa ryngkat kyrdan bad kiwei kiwei ki jylla hapoh kane ka ri India ba ieit jong ngi.
