Shillong, Nailar, 10: Ka Bharatiya Janata Party (BJP) Meghalaya State Unit ka la kam ba kin don san haduh shiphew ngut ki Sitting MLA ki ban sa pynïasoh bad ka BJP ha u bnai Naiwieng mynta u snem.
U State President ka BJP u Bah Ernest Mawrie ha u kyrwoh ba la phah sha ki lad pathai khubor u la ïathuh ba ka party kan sa pynkhlaiñ shuh shuh ïa ki shnat treikam da kaba wanrah ïa ki jingpynkylla naduh ki nongkitkam ha ka Jylla haduh ki District bad ha baroh ki Mandal khnang ba ka jingtreikam kan long kaba khlaiñ.
“Ka Party kan sa pyrshang katba lah ban pynkhlaiñ ïa ki Booth Level ha ki 20 tylli ki Constituency shwa u Nailur, kiba la thikna ban ïoh ïa ka jingjop,” u la ong.
U la pyntip ruh ba ka Party kan sa pynbna paidbah noh shen ïa ka State Election Committee.
“Ki don san haduh hynriew ngut ki kyrtong ha ki katto katne ki Constituency kiba la pan tiket na ka party ïa kiba ngi la pyndonkam da ka formula kaba kine ki kyrtong kin sa ïatreilang ryngkat bad ka party. Kito ki constituency kiba katkum ka jingsorjamin kan long kaba biang, kin ïoh beit ïa ka tiket,” u la ong.
“Lada donkam nign sa pynkhlaiñ ïa ki jingtreikam jong ka party ha baroh ki Mandal. Ka party kan sa shim ïa ka rai hadien ba la ïoh ïa ka kaiphod na ki Booth Level Sashatikaran Abhiyan Committee (BLSAC),” la ong shuh shuh u Bah Mawrie.
“Ha ki katto katne ki bynta ba ki kyrtong ki lane ki Sitting MLA na kiwei pat ki party ki angnud ban pynïasoh bad ka BJP ngin sa bthah ïa ki nongtrei bad ki nongkyrshan jong ngi ban ïasoh pura bad kine ki kyrtong. Ka party kan sa pynthikna ba ki rukom treikam na ka bynta ban pynkhlaiñ ïa ka party yn sa pyndep noh shwa une u bnai (Nailar) bad ka State Election Committee kan sa peit bad bishar bniah bin pa bin katkum ki jingdonkam ba la pruiddak ha ka riti treikam jong ka Party,” la pyntip u Bah Mawrie.
“Shen ngin sa pynbna ïa ki prokram na ka bynta ban pynrung dkhot ha baroh ki Mandal. Ka party jong ngin kan ym kynran dien ban ïoh ïa ka jingjop kaba bun paid ha kane ka elekshon,” la ong shuh shuh u Bah Mawrie.
