Kam don jingmyntoi ka ILP lada ki Nongtrei Sorkar kim shimkhia ïa ka kam ong u heh ka Congress
Shillong, Nailar 10 : U MLA ka Congress bad Chief Whip ka Liang Pyrshah u Saleng A Sangma ula ong “Lada ki Nongtrei Sorkar kim shimkhia satia ïa ka kam ba la bynshet ha ki, ngin ym lah satia ban tehlakam ïa ka jingrung kyrthep ki bar jylla wat lada pyntreikam ïa ka Inner Line Permit (ILP).
Une u Nongïalam ka Congress ula kren ïa kane haba kdew ïa ka jingkheiñ sting jong ki Pulit ka Tnad Infiltration kiba don duty ha ‘Entry and Exit Point’ ha Byrnihat, Ri-Bhoi.
Haba ïakren bad ki nongthoh khubor ha ka sngi Palei, u Saleng ula ong ba ki briew ba don ha duty ha ‘Entry bad Exit Point’ ha Byrnihat, Ri-Bhoi kim shimkhia satia ïa ka kam ban khmih bniah ïa ka rung ka mih ki bar jylla.
“Ngi la ïohi ha Byrnihat ba ka don ha Entry bad Exit Point hynrei haba phi wan ha ka por 8:30 haduh 9 baje mynmiet, phin nym ïohi shuh ïa ka jingkhmih ïa ki briew ba wan rung sha Jylla. Kine ki briew kim shimkhia satia ïa ka kam. Na kata ka daw ka jingrung kyrthep ki bar jylla ka la jia bad wat lada treikam ka ILP ruh, kan ïai long hi kumjuh” ula ong.
U Saleng ula ther tyngeh ïa kine ki Nongtrei Sorkar kiba dei ban talasi ïa ki kot ki sla ki briew ba wan rung sha Jylla bad ong ba ki dei ban shimkhia noh ïa la ka jong ka kam.
“Lada ka Tnad, ki bor treikam hi kim long discipline kumno ngin khmih lynti ban pynsangeh ïa ka jingrung kyrthep ki briew ba nabar ka Jylla” ula bynrap.
Haba kdew ïa ka jingnang bun ki nongshong dukan madan ba beaiñ ha kylleng ki jaka ka Nongbah Shillong, u Saleng ula ong ba kine ki briew kim pat don ha ki 4-5 snem ba la leit noh hynrei mynta ki la die ïa ki mar ki mata ha kylleng ki jaka jong ka Nongbah.
“Ki Dorbar Shnong ruh kin hap ban shimkhia bha ïa kane, ki dei ban talasi man ka por ban tip mano kita ki briew kiba wan rung hapoh ka thaiñ. Ka jingrung beaiñ ki briew kan ïai bteng lada ngi hi kum ki nongshong shong ngim shimkhia satia” ula ong.
Une u Chief Whip ka Liang Pyrshah ula ai jingmut ba ka dei ban don ka jingmaham kaba tyngeh na ka liang jong ka Sorkar ban pynlong ïa ki bor ba dei pyrrkhing ïa ka jingrung ki bar jylla ba kin pyndep hok ïa la ka kamram.