Shillong, Naiwieng 29: U Myntri Rangbah, u Conrad Sangma, u la kyntait ban pynhiar shuki ïa u Myntri Kor bar ri, u Bah Lahkmen Rymbui halor ka jingjia ha Mukroh ha ka 22 tarik mynta u bnai.
Haba ïakren bad ki nongthoh khubor hadien ba la wai ka jingïalang jong ka kynhun Myntri mynta ka sngi, u Conrad u la ong ba ki Party ne mano mano ruh ki lah ban dawa ban hiar shuki, hynrei kaba donkam mynta ka long ban ïapeit shuwa ïa ka jingdonkam ban wanrah biang ïa ka suk ka saiñ ha ka jylla.
“Kane kadei ka por kaba eh bad kaba khih phaloh bha, ngi donkam ban pynleit jingmut na ka bynta ka suk ka saiñ, ym dei ka jingïakynnoh”, la ong u Conrad.
U la ong ruh ba kam dei ka por ban ïashim kabu ban ïohnong na ka bynta ka saiñpyrthei, hynrei ka por ban tem ïa ka ding kaba klang. “Kumta kum ki nongïalam ym dei ban pynshit hynrei ban long jai jai ban wanrah ïa ka suk ka saiñ ha ka jylla”, u la ong.
Na ka liang u Myntri Rangbah, u la ong ruh ba ka sorkar kala shim ki lad ki lynti kiba bun na ka bynta ban pynjai jai ïa kane ka jingkhih phaloh ha ka jylla na katei ka jingjia ha Mukroh.
Halor ka jingdawa ban pynjari noh da ka jingsynshar President ha ka jylla ba la dawa da ka Seng Trinamool Congress, u Conrad u la ong ba kren ka long kaba suk, hynrei kadei pat ka kam kaba eh, haba ka jylla ka don hapdeng ka jingkhih jingkyan ha ka suk ka saiñ. Halor kane ka jingdawa jong ka YMC, u la ong ba ki paidbah ka nongshongshnong ka jylla naduh ki nongïalam niam, ki nongïalam shnong ki riew rangbah ki la wan shakhmat ban kyntu ban pynneh ïa ka shongsuk shongsaiñ ha ka jylla badym dei ban ailad pat ba kane ka jingpyrshang ban thit noh. U kyntu ruh ïa ki paidbah ka jylla ban kin ïarap lang ha kaba wanrah ïa ka jingshongsuk sa shisien pat ha ka jylla.
