K a sorkar jylla, ka la pynbna shuti, na bynta ki ophis sorkar, kaba sdang naduh ka 22 tarik Nohprah 2025 bad katei ka shuti, ka la wan tam noh ar sngi, na kaba ju dei ban sdang ha ka 24 tarik Nohprah lane kaba dei hok, ha ka 25 tarik kaba dei ka sngi shuti ban rakhe ïa ka Khristmas bad ka jingkylli ka long ba kaei mo ka jingmut jingpyrkhat ne jingthmu ba sha lyndet jong kane ka Sorkar Meghalaya Democratic Alliance (MDA) ba kan ai shuti tam 2 Sngi ïa ki nongtrei Sorkar ha kane ka snem jong ka aïom rakhe lehkmen ïa ka Khrismas mynta u bnai.
Lyngba katei ka jingpynbna shuti, kumta ki nongtrei ophis, kin ïoh shuti jan ar taïew eiei, kat haduh ba kin leit sdang trei biang, ha ka 2 tarik Kyllalyngkot 2026 bad ha kitei ki sngi, ki nongtrei ophis kin ïa muja sadhai ha ki shuti kiba jrong jong ki, katba ki riew paidbah kiba leit donkam sha ki Block, sha ki Sub Division, sha ki hospital sorkar, sha ki kashari, na bynta ki kam bapher jong ki, kin hap ban ap shitom, haduh ban da wan u snem thymmai, namar ba ki ophis sorkar ki khang; hynrei tang kito kiba donkam pat sha ki ophis jong ka sorkar India, lada dei sha ka tnat pynïaid telephone ka BSNL, lane sha ki Bank ban sei ne thep pisa bad sha kiwei de kiba bun ki tnat jong ka sorkar India, kin ïoh lad ban leit pyndep ïa la ki kam jong ki, ha kitei ki sngi haneng, namarba ka sorkar India, ka don tang shisngi ka shuti, na bynta ka Khristmas bad katei kan dei ha ka 25 tarik Nohprah 2025.
Ha kitei ki ar taïew duna, kam dei tang ïa ki ophis kiba khang, hynrei kumjuh ïa ki nongmihkhmat paidbah, lada dei ki MLA/MDC bad ki MP, kin don ha ka jingrakhe shuti jong ki bad kin bun ki ban leit shangkai pyngngad ïalade shabar jong ka jylla, shabar jong ka India bad kaba shai, ka long beit ba ha kitei ki ar taïew antad, yn nym don shuh kino kino ki kam ki duk, ha kaba ki paidbah kim lah satia ban leit sha ki jingdonkam bapher bapher jong ki, lait noh sa tang haba don ka saw ka sian ka mynsaw ka mynsnam, lane ka ïashoh ïa dat, ha kaba lehse kin don tang ar tylli ki tnat jong ka sorkar jylla, kiba treikam bad kitei ki kynthup ïa ki pulit bad ki hospital ruh kumjuh.
Ka hukum jong u Lat, ka pyni, ba ki nongtrei ophis, kin ïoh ban trei tam ha ki sngi shuti, hadien ba la plie biang ki ophis treikam, hynrei katei ka jingmut kam ïahab satia, namarba ka jingdonkam jong ki paidbah, kaba mynta ka sngi, yn nym lah satia ban pynkynriah ha kawei pat ka sngi shuti, ka ban jia ha U Kyllalyngkot ne ha U Rymphang jong u snem ban sa wan.
Ka shuti ka dei ka hok jong ki nongtrei ophis, hynrei lada ai shuti palat than, ka la pynjyr-eh ruh ïa kiba ïoh shuti bad lada ki ophis sorkar ki shakri ïa u paidbah kumta ka jingtrei kam dei ban pynhun tang ïa ki nongtrei, hynrei kaba kham kongsan, ka long ban pynbiang ïa ki jingdonkam jong u paidbah paidlang ka jylla.
Kumba la ju ïohsngew na kiba bun ki ki paidbah nongshong shnong ki ju ïathuh khana ba wat ha ki Sngi ba kidei ban treikam ruh kiba bun na ki paidbah ki kynduh mawsiang haba ki leit ban pyndep ïa ki kam ki kam khamtam eh ha ki katto katne ki kam.
Lah ban ong ba bun Hi ki ïathuh ba lada kwah ban pyndep tang ïa kawei ka kam ruh kan shim da kiba bun ki Sngi namar ka jingshah thlia, kumta wat lada ki longtrei ruh ki paidbah ki mad kajuh ka jingeh kumta katno tam lei lei lada ki ïoh shuti.
Ha kane ka snem lehse ka Sorkar Jylla ka la kham pynleh kjeh ïa ki nongtrei Sorkar da kaba ai shuti tam bad lada baroh kiba aikam aijam ki leh lang kane ka juh ka kam katno kin ïoh ïa ki jingïaroh.
Kumba la kynnoh da mano re mano mynshwa ba bun na ki nongtrei Sorkar, watla ym baroh, ki ju poi trei ynda la jan shiteng Sngi bad ynda ki la poi ha kamra treikam ruh kim pat sdang ïa ka kam hynrei sa ka dihsha para nongtrei bad kat ban da sdang ka kam la long lypa kumba shim shuti shiteng Sngi ne half-day leave kumta lada kum kane ka rukom treikam ka ïaid baroh shi snem ka mut lah bun ka shuti ban ïa kaba trei ïa ka kam bad nalor kata sa ka jingshim shuti kaba kidei hok ban shim kumba la bhah ïa manla uwei pa uwei ne kawei pat kawei ka nongtrei Sorkar, shu donbok ba ka Ïingkashari ka la khang noh ïa ki jingkhot pakhang shnong, office picketing bad kiwei kiwei ki jingïakhih kiba ktah ïa u duk u nongbylla Sngi, kumta haba kheiñ lut ïa baroh kine kiei kiei ka lah bun satang ka shuti suda.
Kumta hato kane ka jingai shuti tam da ka Sorkar ïa ki nongtrei Sorkar ka la long lypa kum ka jingpynbeij na ka bynta ka jingpynkhreh ïa ka elekshon 2028?, bad lada ka long shita kumta ki paidbah kin hap wadbniah ïa ka jingthmu hok ba shisha ïa kane ka jingai shuti tam jong ka Sorkar Jylla ïa ki nongtrei kam Sorkar.
