Sa tang khyndiat taiew eh ka rilum Khasi bad Jaintia kan sa jied ïa ki nongmihkhmat kiba thymmai kiban mihkhmat sha ki 29 tylli ki constituency jong ka Khasi Hills Autonomous District Council bad 29 tylli pat ha Jaintia Hills Autonomous District Council. Kumta, na ka bynta kito ki briew kiba kwah ban kamai kane kadei ka samoi kaba paka tam na ka bynta jong ki ban pyrshang lut ki lad ban ïoh kamai na ki kyrtong lyngba kiba bun ki jait kam ba ki leh.
Kane kadei ruh ka por kaba paka tam ïa ki katto katne ki jait briew ban sdang thaw ïa ki kynhun kiba harukom ban ïoh kamai. Kin don kiban thaw ïa ka kynhun ban pynlong ïa ki lympung ïalehkai ba shisien san snem, ki kynhun ba shipor ban trei na ka bynta ka imlang sahlang, ki kynhun ban pynlong jingïakob thei bhabriew rangbhabriew, ki kynhun ban pynlong jingïakob thoh essay, ïakob rwai, ïakob shad bad kin don ruh ki kynhun kiban shim kabu da kaba ong bakin pynlong ïa ki jingsam khusnam ïa kiba pass bha. Kine baroh ki jait kynhun ki ju mih beit tang ha ki samoi elekshon. Kitei ki jait kynhun kin don beit tang para ba sngewthuh jingmut bad da ka jingsngewthuh lang kin leit na uwei u kyrtong sha uwei pat bad kumta ter ter tad haduh ba kin da ïoh ïa ka thong kaba ki kwah.
Haba phai sha kawei ka liang pat, haman la ki constituency la ju ïohi ba shwa ka elekshon, bun bha ki nongleh kam isynei ne ki nongïarap ki pynpaw ïa ka jingkloi jong ki ban tynrong lang ïa ka jingeh ki paidbah. Dei ha kum kine ki snem ba ki paidbah ki ïoh shisien ïoh haduh lai ne saw ngut ki nongmihkhmat. Jin lada long kumne man la u snem, kan pynsuk haduh katta katta ïa uno uno u nongmihkhmat uba shu kwah ban jop tang shi samoi. Kaba kham itynnad bad dei ruh ban ïaroh ba ha kine ki por don ki khep ba jia ki jingjia ba sngewsih kum ka ïap briew, dei ki kyrtong kynthup ïa ki nongmihkhmat kiba poi nyngkong wat ïa ki bahaïing kata ruh ryngkat bad ki song jingïarap.
Dei ha kum kine ki por ba ki paidbah khamtam ha kito ki constituency ba kim ju kham ïohi nongmihkhmat ki shim kabu ban leit sha ki jingïalang bapher bapher ba khot da ki kyrtong lada ïoh jingmyntoi. Dei ruh lyngba kitei ki jait jingïalang ba wan paidbah ba jan baroh ki kyrtong ba ïa khun ki phuh samrkhie da ka jingkyrmen ba ki la jop beit tangba kim tip pat ba ha ka elekshon hi ha ka jylla, jan baroh hi, ki dang bud ne kyrshan ïa kito ki kyrtong ba ai jingmyntoi. Lah ban ong ba don katto katne ki constituency ba ki kyrtong kim da sam jingïarap than hynrei salonsar hi ka pisa ryngkat ka khawai dawai shi taiew ar taiew shwa ka elekshon ka treikam.
Lada ka long kumne hi, shaei ka lawei jong ka jylla kan poi, khamtam haba ki paidbah kim jied ïa u nongmihkhmat u ban leit ïasaid hynrei ki jied ïa uba lah ban ai jingmyntoi. Kan long ruh ka jinglehraiñ ïa kato ka constituency lada jia ba u nongmihkhmat ba ki jied um lait ban ang wat tang shi kyntien ruh ha Ïing Dorbar, kumta ka por ka la poi ïa ki paidbah ba kim dei satia ban pynlehraiñ ïalade bad ïa ka constituency da kaba jied ïa ki nongmihkhmat ki bym lait wat ban ang shi kyntien ha ki Iing Dorbar jong ka Council ne jong ka Jylla ban ïasaid na ka bynta ka thaiñ bad na ka bynta ka bha ka miat jong ka imlang sahlang, ka Jaidbynriew bad ka Jylla hi baroh kawei.
Bunsien hi, haba uno uno u nongmihkhmat u pyni ïa ka jingtbit jong u ban ïasaid ha Iing Dorbar, ki paidbah lada ki kylli sharum shaneng kin ai nam beit ïa ka constituency kaba pynjop bad lada um ler pat ka jingkren bein kan dei ïa ki nongjied hi. Kumta lah ban ong ba lyngba ki kam ba u nongmihkhmat u pyni ha Ïing Dorbar, ka pynpaw ruh sha ka pyrthei baroh ïa ka jingbym nang lane ka jingshemphang jong ki nongthep vote.
Ka por ka la dei ruh ïa ki paidbah ba kim dei shuh ban pyrkhat tang ka bynta ka jingmyntoi ïalade hynrei ban pyrkhat ruh na bynta ka burom jong ka shnong ka thaiñ bad jong ka constituency hi baroh kawei. La ju ïohi ba don ki constituency khamtam ha kito ki constituency ba ki nongmihkhmat ki trei borbah baroh san snem. Bun ki constituency ki peit sha kitei ki constituency da ka jingjawdud ban ïoh lang ïa ki kam pynroi bad kiwei ki jingmyntoi kiba ju lah ban ïoh na ki nongmihkhmat. Kum ka nuksa, ka Shillong South Constituency kadei ka constituency kaba ki paidbah ka jylla ki phaikhmat lut namar ka jinglah bad ka jingnang jong u MLA ka thain Bah Sanbor Shullai ban pyntreikam ïa ki skim bad ruh kumno ban wad ïa ki song jingïarap na bynta ki paidbah ka thain.
Ym tang katta la ju ïohi ba man u snem ka ju don ka prokram ba kyrpang na bynta ki samla pule kiba pass bha kiba wan na ki longiing ba duk kiba ïoh ïa ki song pisa bad don pat kiba ïoh da ki laptop. Kum kine ki sienjam ym tang ba ki ai mynsiem ïa ki khun samla ban leh bha ha ki jingpule hynrei ka pynrhem bad pynskhem ruh ïa ki nongshong shnong ban ïai pynjop na kawei ka elekshon sha kawei ka elekshon.
Haba phai pat sha ki constituency jong ka MDC watla ka skim ka rit hynrei don pat ki nongmihkhmat kiba ïakhun tyngeh ban pyndap pynbiang na ka skim kaba ki ïoh watla ka long khyndiat khynsoit. Na bynta jong ki, kaba ki paidbah eh ki khmih lynti ka long ba kin kren ha ki Iing Dorbar bad ruh ban iasaid ïa ki ishu kiba ktah ïa ka kamai kajih, ka imlang sahlang bad khamtam eh ban ïada na ki jingtreikam kiba lah ban ktah ïa ka jingim kaba man ka sngi.
Kumta sngewdei ban ai jingmut ïa ki paidbah ba ha shwa ba kin leit ban ai ïa ka vote kaba kordor jong ki ha ka 21tarik u Rymphang ba kin da pyrkhat sani bad pyrkhat na bynta ka lawei namar lada ki bakla ka jingbakla jong ki kan ïai sawa bad ïai pasiaw na ka bynta san snem.
