Ka World Cup Cricket ka la kut naduh ka 19tarik, hynrei ki Politician India ki dang ïania sah

Naiwieng 28: Ka jingïalehkai final jong ka World Cup Cricket hapdeng ka India bad ka Australia ka ladep naduh ka 19 tarik mynta u bnai, kata la palat shi taiew, hynrei ki Politician jong ka India ki dang ïania sah haduh mynta ïa ka daw jong ka jingrem ka India ha ka Australia.
Kane ka jingïania ka la sdang nyngkong na u Myntri Rangbah ka Assam, u Himanta Biswa Sarma, uba la ong ba kadaw ka jingrem ka India kadei namar ba ia ka final la pynlong ha ka 19 tarik u Naiwieng kaba dei ka sngi kha jong u Indira Gandhi kaba long ka sngi ba sniew bok ia ka ri. U Myntri Rangbah ka Assam, u la ong ba un sa thoh sha ka BCCI ba ym dei ban pynlong shuh shuh kino kino ki jingïalehkai final jong ki Sport ha India ha ki sngi kiba don ka jingiasoh bad ka sngi jong ki briew kiba dei na ka iing ka sem jong ki Nehru bad Gandhi.
Ha shuwa jong kane, u Rahul Gandhi, ha ka jingïalap elekshon ha Rajasthan, u la ong ba ka jingrem ka India ha ka phainal ha ka Australia kadei ka jingsniew bok u Myntri Rangbah Duh ka ri India, u Narendra Modi, u ba la don lang ha Stadium ha ka sngi ba India ka ïakhun ka India bad Australia. U Modi ym tang ba u la don ha ka Stadium ha ka final, hynrei ula sam ruh ia ka Cup ha u Captain ka Australia bad hadien kane, u la leit iakynduh ruh ïa ki nongïalehkai ka India ha kamra ba ki ju khreh jong ki.
U Rahul u la ong ba u Modi udei uta u PM ym dei u Prime Minister, hynrei u Panauti Modi kaba mut uba sniew bok.
Ka Myntri Rangbah jong ka West Bengal ruh ka Mamata Banerjee, ka la ïasnoh ktilang bad kane ka jingïania ha kaba ïadei bad ka jingshah rem ka India ha ka World Cup Cricket. Ka Banerjee, ka la ong ba ka India ka la rem ha ka final dei namar ba ia ka final la pynlong ha Ahmedabad ha Gujrat, ka jaka jong u Modi. Ka la ong ban dei ban ïalehkai ha ka Kolkata ne Mumbai, katta ka India ka la jop.