Ka VPP kan long jingma ïa kiwei ki seng saiñ pyrthei tang lada ka jop sa na Garo hills : Dr Kharlukhi

Shillong, Jylliew 20: U nongïalam ka National People’s Party (NPP) bad u MP ba marwei ka Rajya Sabha u Dr WR Kharlukhi ha ka sngi Palei u la ong ba ka seng saiñ pyrthei ka Voice of the People Party (VPP) kaba don ha liang pyrshah ka lah ban long ka jingma ne pynjem khnap ïa kiwei ki seng saiñ pyrthei lada ka lah ban jop na thaiñ Garo Hills.
Ïa kane u la phai sha ki jingkam ba la pynpaw da ka VPP ha ka jingïalap election sha ka Lok Sabha election kaba dang shu kut shen ha kaba ka la ong ba ka jingthmu jong ka, ka long ban pynduh jait ïa kiwei ki political party ha Meghalaya.
“Ha kawei pat ka liang ka Meghalaya kam dei tang jong ka Khasi-Jaiñtia Hills region, ka Meghalaya ka dei ruh jong ki Garo. Kumta to ngin ïa peit hadien ba ki la ngam sa sha Garo Hills ha ka kam saiñ pyrthei. Lada ki lah ban jop ha Garo Hills, haoid kin sa lah ban pynjem khnap, ban pynduh jait bad ka jingma, hynrei kumba ka long ka Congress ka la jop sha katei ka liang katba ka VPP sha kane ka liang,” ong u Bah Kharlukhi.
Lah ban ong ba ka NPP ka la rem da 22 na ki 24 assembly constituency ha ki election LS ba dang shudep.