Ka VPP ka ong ba kan sa thaw ïa ka lawei ka Jylla, hynrei kam pyni ïa ka Road Map: HM Shangpliang

Shillong, ïaïong 01: Ka seng kaba la ïalam ïa ka sorkar hapoh ka jylla ka National People’s Party (NPP) ka la ther tyngeh ïa ka jingkular ba la pynpaw da ka seng Voice of the People Party (VPP) ba ka la ong ba kan sa thaw ïa ka lawei hynrei ka khlem pyni ïa ki rukom treikam sha ki paidbah.
U Nongai ktien ka NPP u Bah HM Shangpliang haba kren sha ki lad pathai khubor u la ong ba dei ka sorkar hapoh ka jingïalam jong ka seng NPP ka sorkar MDA kaba la dep ban ïathuh lypa ïa ki nongshong shnong ka jylla shaphang ka roadmap ne ki rukom treikam kumno ban tei ïa ka lawai jong ki samla.
“Ka long kaba suk ban pynthikna sha ki briew da kaba ong ban tei ïa lawei hynrei khlem da batai kumno ban leh ïa kata,” ong u Bah Shangpliang.
U la ong ba ka sorkar MDA ka la wanrah bun ki jingsdang ha kaba ïadei bad ka jingbha jong ka lawei ki samla ha ka jylla la ka long ha ka sengkam lajong bad kiwei ha ka jylla.
Haba ong ba ka PRIME ka la dei kawei na ki kam kiba bha hapoh ka ri India kaba la dep ban pyllait da ka sorkar Meghalaya, u Bah Shangpliang u la ong ba hapoh ka PRIME, ki la don kumba 5,500 ngut kiba la seng kam la jong kiba kiba la ïoh ïa ki lad jingkyrshan kaba la long ka jingïarap ha kaba ïadei bad ka jingkyrduh kam kyrduh jam ha ka jylla.
U Bah Shangpliang u la pyntip ruh ba ki la don haduh 20,000 kiba la seng kam kiba la ïoh ka jingkyrshan CM ELEVATE.
U Bah Shangpliang u la ong ba ka sorkar ka la thaw ïa ka Shillong Tech Park ka la dei ka kaba la ïarap ha ka ban sengkam la jong.
“Kine ki la dei ki jingsdang kiba la dei ki nongrim kiba donkam ïa ka lawei jong ki samla ban shim kabu ïa ki lad jingïarap ba la ai da ka sorkar,” ong u nongaiktien ka NPP.