Ka UCC ka dei ka aiñ rew ba shyrkhei, ngim dei ban pdiang da lei lei : Mayral Born Syiem
![](https://mawphor.com/wp-content/uploads/2023/07/mayralborn-syiem.jpg.jpeg)
Nongpoh, Naitung, 04: U MLA jong ka Nongpoh Constituency u Bah Mayral Born Syiem ha ka sngi Baar u la pynpaw ka jingsngewkhia kaba jur halor ka jingthmu jong ka Sorkar Pdeng ban pyntreikam noh ïa ka Uniform Civil Code (UCC) ha baroh kawei ka ri India ïa kaba yn sa rah sha Parliament ban ïoh ïa ka jingmynjur.
“Kane ka dei ka aiñ rew kaba shyrkhei bad ka dei ka buitpoh jong ka Sorkar BJP ban thombor ïa ki jaitbynriew riewlum kiba don la ka jong ka jinglong kyrpang naduh ka shongkha shongman, ka jingpynlait san shyieng, ka jinghiar pateng bad kiwei kiwei,” ong u Bah Syiem ha ka jingïakren bad ki lad pathai khubor.
“Haba ngi ïakren shaphang ka UCC ka la kdew ha ka Article-44 jong ka riti synshar ka ri bad ma ngi kum ki riewlum ha ka dong Shatei Lammihngi ngi don ka jingïada kaba kyrpang ïa ka riti ka dustur, ka khyndew ka shyiap bad ki riti ki dustur, namarkata, lada ka UCC kan treikam ha kane ka ri ka jong ngi ka long kaba ma haduh katta kata namarba ngi don la ka jong ka riti dustur,” u la ong.
U la bynrap ruh ba lada pyntreikam ïa ka UCC kaba mut kan don tang kawei ka aiñ ha ka ri India baroh kawei naduh ka shongkha shongman, ka jingpynlait san shyieng, ka jinghiar pateng, ki kur ki jait ki kynja bad kiwei kiwei ha kaba kan ktah shibun ïa ka jylla bad ka jinglong kyrpang kaba kum ki riewlum ki im baroh shi katta.
“Ngi don ïa ka Christian Marriage Act 1872 kaba dang pyntreikam haduh mynta bad ka UCC kan dei ka aiñ kaba shyrkhei haduh katta katta lada pyntreikam ha ka ri,” u la bynrap.
U la ong ruh haduh mynta ym pat tip ïa ka Draft jong ka Bill kaba dang dei ka Aiñ-rew namarba ka Sorkar ba la ïalam da ka BJP ki la don ka rukom pyrkhat ban wanrah ha Parliament. “Ngim pat ïohi ïa ki jingthoh ha ka Bill la ki jaka riewlum kiba dei ki Schedule Area ki lait neem, hynrei kumba lah ban sngewthuh lada kan treikam hi daleilei ngim dei ban pdiang ïa kane ka Bill namarba ïa ngi la ithuh kyrpang wat ha ka Khyrnit Bahynriew jong ka Riti Synshar ka ri bad ka jingdon jong ki Autonomous District Council, ki Dorbar Raid bad kumta ter ter,” u la ong.
U Bah Syiem u la kyntu ruh ïa ki MP kiba mihkhmat ïa ka Jylla Meghalaya bad ki jylla jong ka thaiñ Shatei Lam Mihngi ba kim dei ban ai ka jingmynjur bad kam dei ban ktah ïa ka jinglong jingman ha ka jylla, namarba kine ki dei ki buitpoh kiba shyrkhei bad kiba ima ban peit kumba ka Sorkar Pdeng ka pyrshang ban tuklar bad mushlia wat ïa ki rukom im namar lada kane ka aiñ kan treikam baroh ngi hap ban bud kajuh ka rukom im ha baroh kawei ka ri.