Ka tyllong umdih ka shnong Umroi Madan ka jngai na jaka ba shna 4 -lane, pynshai ki nongïalam shnong

Nongpoh, Nailar 21: Tang hadien 1 sngi ba ki nongshong shnong jong ka shnong Umroi Madan kila leit ban ujor syndon sha u Deputy Commissioner ka Ri-Bhoi ban pynpaw ka jingpyrshah halor ka jingthmu ka sorkar ban pynkynriah ïaka lynti ïaid jong ka surok 4 lane ka ban sa shna thymmai naduh Umiam sha Malidor bala mih ruh ka jingkynnoh ba ki nongïalam shnong ki khlem kren ne shimkhia eiei halor ka jingshah ktah ka tyllong umbam jong ka shnong Umroi Madan lada pynïaid ïa katei ka surok katkum ka jaka bala dep sor jamin, hynrei kitei ki nongshong shnong kila dawa ba dei ban pyniaid beit na ka surok ba rim ba ïaid ka surok Shillong Bye Pass.
Halor katei ka jingleit ban ujor bad kynnoh da kitei ki nongshong shnong naka liang ki nongïalam shnong jong ka shnong Umroi Madan ba kynthup ïa u Bah Lamborlang Makri, Rangbah shnong, u Bah Banshanskhem Rynjah, secretary shnong lem bad ki dkhot ka Executive Committee, ki la pynpaw ba katei ka jingujor bad ka jingkynnoh kitei ki nongshong shnong ka dei kaba khlem nongrim, namar kum ka shnong kala dep ban phah jingthoh naduh ka 23 tarik Naiwieng 2023 sha u Deputy Commissioner ka Ri-Bhoi ba kum ka shnong kam don kano kano ka jingpyrshah ïaki kam pynroi hynrei naka liang ka shnong kala kyrpad ba dei ban pynlait ïaka tyllong umbam umdih jong ka shnong.
Shuh shuh halor katei ka jingkyrpad jong ka shnong naka liang u DC ka Ri-Bhoi u la phah ruh daka shithi sha u General Manager ka NHIDCL, PMU-Mylliem kaba dei ka kompani ba pyntrei ïa katei ka surok ba ka dei ban shimkhia halor katei ka jingkyrpad jong ka Dorbar Shnong Umroi Madan ban pynlait ïaka tyllong um jong ka shnong bad kum ka shnong kala ioh ruh ka jubab ba ïa katei ka surok la pynïaid noh na kawei ka jaka bad katei ka ka tyllong umbam jong ka shnong kam ngat satia haka jingshna ïaka surok 4 lane.
Kumta naka liang ka shnong ka pynpaw ka jingsngewkmen halor ka jingwan ka skhim pynroi ban shna ïaka surok 4 lane ha Umiam sha Malidor kaba dei ka jingkyrkhu ïaki paidbah, bad kyrpad ruh ïaki nongshong shnong ba kim dei ban sngewthuh bakla namar katei ka surok kan nym iaid shuh naka tyllong umdih jong ka shnong bad kyntu ruh ïakino kino ki bym sngewthuh ki dei ban ïakynduh ïaki nongïalam shnong naka bynta ka jingshai.