Shillong, Risaw 12:Ka nongbah Shillong ka la pynkhreh ban pdiang sngewbha ïa ka tamasa ban pyni ïa ka lariti bad ki jingbam tynrai ba ar sngi kata ha ka 14 bad 15 tarik u Risaw, 2022 kaba la tip kum ka Tri Hills Ensemble ha phyllaw ka State Central Library ba pyni sha ka pyrthei ruh ïa ka jingriewspah ka jylla ha ka riti dustur kyrpang kaba pher na ka jong kiwei.
Kane ka tamasa ka long shi bynta ban kyntiew bad pynpaw pyrthei ïa ki riti dustur tynrai ha ka treikam treijam, ka rukom shet jingbam, ka rwai ka siaw, ki jingshna ba har rukom jong ki jaidbynriew riewlum Khasi, Jaintia bad Garo ka Jylla Meghalaya.
Ha kane ka tamasa yn pyni nam ïa ka ‘Shad Ngoh Krai’ jong ki Nongwahkhen, bad ka ‘Shad Miet Raid Mawja bad ka jingdie ïa ki jingbam tynrai jong ki jaidbynriew kum u pu-saw bad putharo, ka Kharang na Jaintia Hills, ka dohthad na Laitkyrhong, ka Dohjem na Sohra, ka Dohtowel na Kynshi, ka Doh-snam’ na Laitlyngkot bad ka ‘etchaluk’ ne ka mat-tah ba la shet na Garo Hills.
Kan don ruh ka jingdie ïa ki jingdih ba kynthup kum ïa ka ‘bitchi’ na Garo hills, ka ‘Ïad um na Ri-War bad ka sadiar na Jaintia Hills, u ‘ Maggi Mawkdok’ u ‘Putharo Ïalong’.
Ha kane ka tamasa yn die ruh ïa ki jingbam ban pynphalang ïa ka jingkyrpang bad ka jingbna nam jong ki jingbam kaba kine ki jingbam ki mih kum ‘Kong Thangkhiew’s food stall’ na Umsning, ‘Dukan Meiduh’ na Mylliem, ‘Pyrda Saw’ na Nongpoh, ‘Bei PWD’ na Lachumier, ‘Tratoria’ na Khyndai Lad, ‘You n I
Café’, ‘Chicken Wagon’ bad kiwei kiwei bad ruh kum.
La ong ba kane ka tamasa kan long shi bynta ka jingrakhe ïa ka jingdap 75 snem ka jingïoh laitluid ka Ri India bad 50 snem ka jingïoh ka Meghalaya la ka jong ka Jylla bad yn don ka jingpyni ruh ïa ka phlim shaphang ki nongïakhun laitluid kiba ka jylla ka la pynmih kum halor ka ‘Phan Nonglait’ bad ‘U Woh Kiang Nangbah’ ïa kaba yn ak da ka Panaliar Club na Jaintia Hills.
Shuh shuh u ong ruh ba ïa katei ka tamasa la bei tyngka da Ministry of Tribal Affairs jong ka sorkar pdeng ka Sorkar Culture Department jong ka sorkar jylla ha ka mang jinglut kaba long 43 lak tyngka bad yn pynphriang sha satlak ka pyrthei ïa kane ka tamasa da ka Weskin Enterprises.
