K a Meghalaya kadei shisha ka jylla kaba U Blei U la kyrkhu namar ka jingdon ka mariang kaba pyngngad bad kumjuh ruh ka jingdon ka spah mariang kaba lehse kiwei pat ki jaka ki bynnud ba kim don kumba don ki jaka ha kane ka jylla. Ka jylla ka don ïa ki lum ki wah, ki krem ki kroh, ki kshaid bad kiwei pat ki jingpynlong U Blei lynba ka mei mariang. Dei namar kane ka daw ba ka wat lada ka jylla kam pat don ïa ki Airport kiba biang ne kiba heh, ne ki surok kiba ong kita ki Express Highway ne ka Lynti rel, pynban ki briew na kylleng ka Pyrthei ki angnud ban poi sha kane ka jylla.
Shisha ka kam jngohkai pyrthei ha kine ki khyndiat snem baladep, ka la kiew kynsan ha kaba lah ban shakhi na ka jingmih ki Hotel, ki Resort, ki Guest House, ki Home Stay ha kylleng ki jaka jong ka jylla, kiba mynshuwa yn lap tang ha Shillong bad katto katne eh ha ki thaiñ Sohra. Ka jingroi sted ka Science bad Technology lyngba ka juk jong ka Digital Information,ki briew na kylleng ki ïohi lut ïa ka jingitynnad ka mariang hangne lyngba ki Social Media. Ki Youtuber kiba pawnam jong ka ri India bad wat jong ka pyrthei ruh ki tuid sha kane ka jylla ban pynphriang ïa ka khubor jong ka jingitynnad ka mariang hangne.
Kane ka jingkiew ka Tourism ha ka jylla shisha ka la long ka jingkyrkhu kaba khraw ïa ki paidbah khamtam kito kiba ïadei kam bad ki kam shang pyrthei, la ka long ki trai Hotel, ki trai Guest House, Home Stay, nangta ki nongpynïaid ïa ki Restaurant, ki Dukan, ki trai kali, ki nongñiah kali bad bun kiwei kiwei pat ki bynta kiba la ïoh nong namar kane ka jingkiew ka kam shang pyrthei ha ka jylla. Ka nuksa ka long ka Sohra, kaba la shah lynshop namar ka jingtroiñ nih ka karkhana shna dewbilat ha Mawmluh, hynrei ka jingkiew ka kam shang pyrthei ka la ïarap shibun eh ïa ki paidbah kane ka thaiñ.
Hynrei hapdeng kane ka jingkiew ka kam shang pyrthei la khmih lynti ruh ba ki kali kamai hangne ruh kin ioh jingmyntoi lang kumba ïoh jingmyntoi lang kiwei kiwei pat. Pynban kaei kaba la ïohi ha kine ki sngi ka long ba ki trai bad ki nongñiah kali ki la ud pynban ba ka jingkiew ka kam shang pyrthei ka la long pynban ka jingduhnong ïa ki, namar ka jinghiar ka kamai kajih, kat haduh ba ki kali tourist bad wat ki kali local taxi ruh ki la ïashim bynta lang ha kane ka jingïakhih.
Ki nongïalam ka All Khasi Meghalaya Tourist Taxi Association naduh u snem baladep, ki la ud ba ka kamai kajih jong ki ka la hiar namar ka jingïoh lad ki kali ba nabar ban rung lut sha ki kyndong ki kynshrot jong ka jylla ban kit ïa ki tourist kiba wan nabar, kaba mut ki tourist kiba wan nabar kim pyndonkam shuh da ki kali tourist kiba na kane ka jylla. Kane ka long mar khongpong na kaei kaba long ha Sikkim, kawei pat ka jylla kaba kiew bha ha ka kam shang pyrthei, ha kaba ki kali kiba wan nabar kiba kit ïa ki tourist kim ju ïoh lad ban rung sha ki kyndong ki kynshrot jong ka Sikkim ne sha ka tourist spot kumba long ha Meghalaya.
Dei halor kane ka nongrim ruh ba ki kali tourist hangne ruh ki dawa ba ka sorkar kadei ban leh kumjuh kumba leh ha Sikkim ha kaba ki kali kiba wan nabar kin ieng beit ha kawei jaka ba la pynkhreh da ka sorkar ban a kane ka jaka ne ki jaka, ki kali tourist kiba dei na kane ka jylla kin kit pat ïa ki tourist kiba wan nabar sha ki jaka jngohkai kiba don ha Meghalaya. Kane, ki la ong kan ïarap shibun eh ïa ki ha ka kamai kajih, ym kumba long mynta ha kaba ïa kamai kajih jong ki la knieh noh da ki kali kiba wan nabar ki bym siew eiei sha ka sorkar Meghalaya.
Lada pyrkhat ïa ka jingkiew ka kam shang pyrthei te ka sngewdei ban ailad beit ïa ki kali kiba wan na shabar ba kin leit sha ki jaka jngohkai pyrthei khnang ba ki tourist kin suk kin wan da kajuh ka kali bad kin leit phai ruh da kajuh ka kali. Hynrei ki kali tourist hangne kidei kiba la siew ka pisa sha ka sorkar la ka long ki tax, ka permit, ka insurance bad kiwei kiwei de ki jingsiew, te ki donhok hi ban ïoh ka kamai kaba bit ba biang ha la ka jong ka jylla. Ka jingbun ki tourist kan long ruh ka jingkyrkhu lang ïa ki. Bad lada ki im ka kami ne ïoh ka kamai kaba biang, kiba bun ki samla, wat kiba la nang la stad kin pynïaid ne wat ban ñiah ïa ki kali tourist haba ka kamai kajih ka don.
La ïoh ruh ba wat ka sorkar ka la pynshlur ïa ki samla ba kin shim ïa kane ka kam, da kaba ka ai subsidy ïa ki samla ba kin buh ïa ki kali tourist, hynrei lada ka kamai kajih kumba la ud da kiba don kali private ban kamai tourist kam long kaba biang, kumni ki samla kin shlur ban shim ïa ka subsidy ne buh ïa ki kali. Nalorlata lada ka Sikkim ka la lah ban pynim ïa ki kali tourist da kaba kam shah ïa kiba nabar ban rung katba mon, kan eh aiu ïa ka Meghalata ruh ban leh kumjuh.
