Ka jingmih surok jong ki Waheh Chnong ka sor Jowai dang shen kan long ka jingpynkyndit thiah ïa ka Jaiñtia Hills Autonomous District Council bad ïa ka Jowai Municipal Board (JMB) ban wad ïa ka jaka thehñiut kaba biang na ka bynta ki phew lak tylli ki longiing jong ka shnong Jowai kiba la ïakynduh mawsiang na ka daw ka jingpyrshah kaba jur jong ki 6 tylli ki shnong ban dang theh ñiut ha ka shnong Mynkjai bad ha kiwei kiwei de ki shnong.
Ka Jowai Municipal Board kaba peit ïa ka khuid ka suba jong ka shnong ka thaw hapoh ka sor Jowai ka ladei ban thawlad na ka bynta ban weng ïa u sohkyrdot ba ki paidbah ka sor Jowai ki la ïakynduh mawsiang. Ka jingpynlang ïa ki ñiut ki ñier hapoh ki jaka iew bad kat shaba lap bashem kan sa pynkha ïa ki khñiang jingpang ba laiphew jait khamtam ha kum kane ka por ba ka pyrthei baroh kawei ka dang ïakhun thma pyrshah ïa ka jingpang COVID-19.
Kane ka ishu bret ñiut kaba la kylla ka mat iakren ha mala ka thliew iing ha West Jaintia Hills ka la pynkhihwin ia ka shong ka thaw bad khamtam ia u MLA ka Jowai u Ma Wailadmiki Shylla bad ia u Ma Sniawbhalang Dhar uba long u Myntri ka tnat Pynroi ka Sorkar Jylla. Hato kaei ka lad ka lynti kaba kine ki anrgut ki shakri paidbah kin leh ban weng ia u sohkyrdot uba ki paidbah ki la mad baroh shikatta khmatam eh haba ka surokbah ha sor Jowai ka la kylla long pynban kum ka Dustbin lane ka jaka theh ñiut kaba la pynisaitmet haduh katta katta ia ka sor baroh kawei.
Kumba ka long mynta, ïa kane ka jingeh jong ki paidbah ka sor Jowai ym shym la don satia mano mano ba lah ban loit ban law namarba ka Jaiñtia Hills Autonomous District Council, ka ophis jong u Deputy Commissioner ka West Jaiñtia Hills, kynthup ruh ïa ka tnat Pynroi Sor kim pat lah satia ban pynïoh ïa ka jaka theh ñiut kaba biang pura haduh kine ki sngi ïa ki lak ngut ki paidbah jong ka Sor Jowai kaba la nang kharoi ki nongshong shnong na uwei u snem sha uwei pat.
Ka jaka theh ñiut kaba don ha Marten, Shillong ïa mynta ka ladei lypa ka jaka kaba la shlei haduh katta katta da ki jaboh jabaiñ bad kaba la buh jingma ruh wat ïa ka Damsite namarba lada ka kynroh kan bthei sha ki bynta jong ka lynti rim khlem pep ki jaboh jabaiñ kin sa tuid lut sha kane ka pung kaba kongsan tam hapoh ka jylla Meghalaya baroh kawei namarba ka dei ruh ka shlem pynmih bording ïa ka jylla.
Ka jingheh jingïar jong ka West Jaiñtia Hills District bad ka East Jaiñtia Hills District kam dei shuh kaba rit bad ki dei ruh ki ar tylli ki District kiba dang bun bha ki jaka khlaw ha kaba ka tnat Pynroi Sor bad ki bor synshar District ki dang lah ban thawlad na ka bynta ban pynïoh ïa ka jaka thehñiut. Manla ka sngi da ki phew ton ki ñiut ki mih na Sor Jowai, kata, na ki thliew iing jong ki briew bad na ki jaka iew. Ban shu sngap mynthi halor kane ka jingeh kam long satia kaba dei namarba ki paidbah hi ki dei kiba ïakynduh mawsiang lada kam don ka jingshimkhia na ki bor bahalor bad na ki bor Sorkar.
Lada ka Synjuk Waheh Chnong Jowai ka sngewkhia haduh katta katta ïa ka jinglang jong ki ñiut ha Sor Jowai ka la dei ban ai jingmut sha ka tnat Pynroi Sor, sha ka JHADC,sha ka JMB bad sha ki bor synshar shnong ban wad ïa ki lad ki lynti kiba lah ban pynkut noh ïa kane ka jingeh shisyndon. Ki dang bun ki jaka jong ka District Council ha West bad ha East Jaiñtia Hills kiba lah ban pynlong kum ka jaka thehñiut bad kiba dang jngai bha na ki shnong briew. Lada ki bor sorkar bad ki bor synshar shnong kim don ka jingïohi jngai ïa kane ka mat kaba kongsan kaba la pynmih ruh wat ïa ka jingïakynad kumba ka long mynta khlempep kan sa buh ïa ka jingeh hapdeng ki nongshong shnong na ka shnong Jowai bad na ka thaiñ War Jaiñtia.
Shi syn pyrkhat ban wad ïa ka jaka theh ñiut kam dei satia ban long u mawjynthud ïa ka imlang ka sahlang bad kam dei ban buh diengpynkiang ruh ïa ka dong ka thaiñ bad ïa ki paidbah nongshong shnong. Kum kine ki jingeh ki mih ruh na ka daw ka jingbym don mon jong ki bor synshar ban weng ïa kine ki jingeh kiba u paidbah u la mad. U MLA uba dei u shakri jong ki paidbah u dei ban leh eiei halor kane ka jingdawa khnang ba kan ym mih shuh kum kane ka jingïapher jingmut hapoh ka dong bad ka thaiñ baroh kawei.
Kane ka jingjia ka dei ruh ban long ka jingsneng ka ban pynkyndit thiah ïa kiba bun ki shnong hapoh rilum Khasi bad Jaiñtia khnang ba kin wad lypa ïa ki jaka na ka bynta ban pynlang ïa ki ñiut ki ñier bad ki jaboh jabaiñ kiba mih na ki thliew ïing jong ki nongshong shnong.
