Shillong, Nailur 14: U Myntri ka Tnad Community & Rural Development, AT Mondal ha ka sngi Palei, ula pynshai ba ka Tnat ka ju siew tista beit ïa ka bainong jong ka MGNREGS haba phah pisa ka Sorkar India.
“Kumta ka jingsiew bainong kam don jingïadei eiei ruh em bad ka Sorkar Jylla. Ka dei kaba la phah beit beit sha ki account jong ki job card holder,” ong u Mondal haba ïakren bad ki nongthoh khubor.
Halor ki jingkynnoh bamsap ha ki VEC, u Myntri ula ong ba haba mih kino kino ki jingkynnoh, ka Tnad ka ju thung beit ïa ki jingtohkit.
“Ngi la bthah ïa ki BDO ba kin khmih ïa baroh ki bynta katkum ka riti treikam jong ki VEC bad ki la shimkhia bha ïa kane,” ula ong.
Ka jingkren jong u Myntri ka la long hadien ba ki la mih ki jingkynnoh ba ka tnat kam ju siew satia ïa ka bainong jong ki job card Holder ha kaba ïadei bad ka jingpyntrei ïa ka skhim 100 sngi.
