Shillong, Rymphang 23 : Ka BJP ka la kynnoh mynta ka sngi ba ka All India Congress (AITC kaba dei ruh ka TMC) ka kwah ban wanrah da ka raibi bamsap ha Meghalaya katba ka NPP pat kan ïai bteng ïa ki kam buit bamsap jongka khamtam ha ki rukom thung kam thung jam.
Haba kren sha ki lad pathai khubor u nongpathai khubor ka BJP u bah Mariahom Kharkrang u la ong ka party kaba na West Bengal kaba kren ban ai kam 3 lak ngut ïa ki samla bad ai ruh bad ka pisa ban pynbieij ïa ki nongthep vote ka dei ka party kaba la leh ïaki kam bamsap ha ka West Bengal School Service Commission.
Kane ka kam bamsap ne ka scam ka dei halor ka jingthung kam beaiñ ïa ki nonghikai bad ïa ki bym dei nonghikai ruh ha ki skul ha West Bengal. ïa kane ruh lah ban khot ka Flagship Prokram jongka TMC ban thungkam thungjam beaiñ. Hato ka kwah ban pyntreikam ïa kane ruh ha Meghalaya.
Une u kyrtong ka BJP na North Shillong u la ong ba da ki polisi kiba thmu ban kyntiew ïa ka rukom im jong kiba duk ba kyrduh kum ka MNREGA kam map namar ka la don ka jingkiew ha ka kam bamsap ha katei ka jylla ba synshar ka TMC ha kaba ïa ki BDO la hukum ban ot ia ka pisa hana na ka bynta ban ai ïa ki Job Card.
ïa ki nongpeit nongpynïaid ïa ka MNREG la thung da ki nongïalam ka TMC lyngba ka ophis ki BDO kiba don bynta ban ot pisa na katei ka job card. Kiba ym lah siew ïa ka pisa ki la shah pynthut ne pynslem ban ïoh ïaki job card, ong u bah Kharkrang. Kane ka dei ka buit bamsap jongka TMC ba ka kwah ban wanrah ha Meghalaya.
U la ïathuh ba mynta ka sngi ka ïing bishar ka la kyntait ïa ka jingpan jamin ïa ka kurim bad u khun jong u MLA ka TMC u Manik Bhattacharya uba dei u President ba rim ka West Bengal Board of Primary Education.
Baroh arngut la rai ban set phatok ïa ki. U Manik ruh u la shong phatok halor ka jingthung kam beaiñ ha ki skul ba ïarap pisa ka sorkar ha West Bengal.
U la ther tyngeh ruh ïa kine ki nongïalam ka TMC ha kane ka jylla kiba ym lah satia ban ïarap ban pyllait ïa ka kam tih bad khaïi dewiong mynba ki dang don ha ka Congress bad ha ka bor.
U la ong ba u dewiong u dei uwei u tyllong ai kam ai jam ïa ki paid ka jylla hynrei la shu khang ban tih bad khaïi naduh ka por jongka Congress. “Kine ki nongïalam ka TMC kiba mynta ki bym larkam hangno hangno ruh ki dei kiba don mynshwa ha ka Congress bad kiba khlem shim khia ei ei ruh ban thaw lad ban pyllait ïa kane ka kam tih bad khaïi dewiong” ong u bah Kharkrang.
“Kine ki nongïalam ka TMC ha kane ka jylla ki dei ki juh ki dakaid kiba synshar ïa ka Meghalaya ha ki phra snem shwa u 2018. Kine ki khlem leh ei ei ban pynïoh kam ïoh jam ïa ki samla bad mynta ki pyrshang ban pynbieij bad pynthame ïa ki paidbah ban ïoh lad biang sa san snem ban ïalehkai bad ka lawei jongka jylla”:, ong u bah Kharkrang.
Da kaba ther shuh shuh ïa ka TMC ba ka la shu kular thok ïaki paidbah kum ka West Bengal Student Credit Card Scheme, u la ong kane ka Credit Card ruh ka dei ka kular shwa ka election na ka bynta ki khnnah Class X ba kin ïoh ram haduh 10 lak tyngka ba kin bnteng ïa ki jingpule da kaba siew sut kaba rit hynrei ka TMC ka la pulom ha kane ruh. Namar na ki 1,12,745 ki aplikeshon kiba ïoh ki long tang 20,000 bad kiba la ïoh ïa kita ki credit card ki long tang 3,000 ngut.
“ Ki bor pynïaid ha West Bengal ki phah ïa ki samla pule ban wanrah da ki kot ki bym donkam khnang ban ïoh kyntait ïa ki aplikeshon jongki. Don pat kiba la shah jied hynrei kim ïoh satia ïa kata ka skhim bad ka sokar West Bengal kam lah ban pynbeit ïa kane ka jingeh jongki samla pule” ong u bah Kharkrang.
U la ong ba kane ka Meghalaya Youth Employment Card (MYEC) ruh ka dei sa kawei ka jingkular ban thok ban shukor ïa ki samla ha Meghalaya kumba la thok la shukor ïaki samla ha West Bengal.
Shuh shuh u bah Kharkrang u la ong ka jingkular jongka NPP pat ban ai kam 5 lak ngut ïa ki samla kan long thik kum ha kine ki san snem bala dep namar ha ki san snem ban dang wan ruh yn sa ïohi ba kin don da ki lak tylli ki post ban lait thylli. Haba ym shym la thungkam, ha kaba kut yn sa thung da kiba haïing bad ki khun jong ki nongïalam bad MLA ka NPP.
Kumta kam don ka jingïapher satia hapdeng ka TMC bad NPP katba ki nud ban kular ban ai kam pat da ki lak ngut.
U la ong lada ka BJP ka ïoh ban synshar yn sa thung da ka Meghalaya Combined Recruitment Commission ha kaba ïa ki post Grade III bad IV yn thung beit khlem interview bad yn thung kam ruh ha baroh ki tnad sorkar khnang ban pynduh pyndam ïa ka jingbam sap ha ka thugnkam thung jam. “ Ngin wanrah 3.5 ki kam ha kine ki san snem bad ngin buh ruh ar tylli ki SEZ bad sa kawei ka Additional IT Park. Ka kam jngohkai ka long kawei na ki lad ai kam ba heh ha ka jylla na kata ka daw da ka jingkyrkhu u Myntri Rangbah duh u Narendra Modi yn sa mang 1000 klur ban kyntiew ïa kane ka kam ha baroh kawei ka jylla bad yn aikam ruh palat 1 lak ngut tang ha kane ka kam jngohkai pyrthei.
