Shillong, Rymphang: Ka nongaiktien jong ka seng National People’s Party (NPP) ka Dr. M Ampareen Lyngdoh ka sngew ba ka party All India Trinamool Congress (AITC) ka kham sngewtynnad ha ban ïalap ïa ki mat kiba long pyrshah ïa ka BJP ha ka jaka ban pynpaw ïa ka jingthmu ba bha ka jong ka na ka bynta ki nongshong shnong jong kane ka jylla Meghalaya.
Ka la ong ruh ba ka jingpyrkhat jong ka TMC ban ïoh ïa ka jingjop ha Meghalaya ka dei tang u mawjam na ka bynta ka jingangnud ka jong ka hapoh ka ri. Ka la ong ruh ba ka TMC kan ym lah ban long ka sur na ka bynta ka thaiñ shatei lammihngi (Northeast), namar kim pat sngewthuh bad tip ei ei shaphang ka Meghalaya. Kum ka nuksa, ka jingkut jingmut jong ka TMC ban pynïoh ïa ka jingïarap pisa kaba T.3,000 klur shi snem sha ki nongshong shnong lyngba ki ‘baaki cards’ kan ym lah ban long ba ki jingpynlut pynsep ki jong ngi halor ki kam pynroi kan long tang T.4,000 klur, kata tad lada ki la pynsangeh noh ïa ka jingai tulop bad ïa ka baibam tymmen ne pension.
Nalor kata ka la ong ruh bad ki rukom treikam jong ka TMC ha kaba ïadei bad ka jingaibor ïa ki kynthei ha ki mat treikam ki jong ka ki dei tang ki buit ki bym shym la ïoh ïa ka jingithuh ha kane ka jylla.
Ki la pynbna ïa ka skhim ban thaw 1,200 tylli ki kynhun SHG man ka la snem khlem da sngewthuh ba ha ki 5 snem kiba la dep ka sorkar jong ngi ka la lah ban thaw haduh palat 7,500 tylli ki kynhun SHG man ka la sngi, kumta ruh kim pat shym la tip bha ha kaba ïadei bad ka roi ka par jong ka jylla.Ka long ruh kaba sngew phylla ba u Dr Mukul Sangma um shym la kren ei ei halor kiba kum kine ki mat hapoh ka party jong u, kaba pynpaw lehse namar ka jingbym don bor ne ka jingïatrei-lang bad ki bor ba halor.
Dang shen la sakhi ïa ka video kaba la saphriang ha kaba la ïohi ïa ka Mamata Banerjee kaba dang byrthen ïa ki heh sorkar halor ka jingkyrpad ban pynïoh fund na ka bynta ki kam pynroi, kata da kaba ong ka jingïarap pisa ka la lut hadien ba la sam ïa ka skhim kaba 1.6 klur sha ki longkmie ha Bengal. Kaba kum kane thik kan sa wan jia ruh ha Meghalaya. Haba pyntreikam ïa ki skhim khlem kano kano ka plan kaba biang kane kan pynrandien da 30 snem ïa ka jylla Meghalaya.
“Ha West Bengal, ki nonghikai bad ki nongtrei ki la pynlong ki jingïakhih na ka bynta ban kyntiew ïa ki DA bad ki tulop ka ban long mar ryngkat katkum ka standard hapoh ka ri.Wat na ka liang ka ïingbishar High Court ka la hukum ïa ka orkar jylla ba kan pynthikna ha kaba ïadei bad ka jingsiew thikna ïa ka tulop, hynrei ka sorkar jong ki kam pat shym la leh ïa kane.Hynrei, ki la pynshai pynban da kaba ong ba ka CM ka West Bengal ka la pyrshang ban kyntiew ïa ka rukom im jong kito ki briew kiba dang sahdien ha ka jylla lyngba ka jingwanrah ïa ki projek bapher bapher kaba long ka daw halor kane ka jingpynslem. Kumta ruh kaba kum kane kajuh ka jinglong jingman ha Meghalaya kan ktah jur ïa baroh ki paid nongshong shnong,” ong shuh shuh katei ka nongaiktien.
Shuh shuh kala ong ruh ba ka jingbishar bniah da kine ki nongïalam saiñ hima ka jylla ka long ba kine ki nongïalam kiba ka TMC ka la jied kim shym la lah ban pyntreikam ïa ki jingdonkam kiba ïadei bad ka roi ka par ha Meghalaya ha ki 8 snem jong ka samoi treikam ka jong ki bad mynta i kumba kila kyndit bynriew bad bunkam ha kaba kyntiew ïa ki skim na Bengal.Kine ki dei ki juh ki nongïalam kiba la pynlong ïa ka Meghalaya ba kan hiar arsut ha ka liang ka koit ka khiah, ka pule puthi, ka roi ka par bad kiwei pat.
Haba phai sha ka jingkyntiew ïa ki SHG ki la don tang 5000 tylli ki kynhun SHG ia kiba la thaw kat haduh ka snem 2018.Hynrei, ha kine ki san snem jong kane ka sorkar barim la lah ban thaw haduh 43,000 tylli ki kynhun SHG.
