Mar ïa shimti kum u Director General of Police ka Jylla Meghalaya u Dr. LR Bishnoi u la pynbna ba ka tnat Pulit kan ïakhun thma ban rat dyngkhong ïa ka jingjyllei jong u drok ha kane ka jylla Meghalaya bad ban kdiah ruh ïa u budlum jong ki snar nongkhaii drok kiba wanrah ïa u drok nabar ka jylla bad nabar ka ri India ban shalan ïa drok ha ki jylla ka thaiñ Shatei Lammihngi.
Haduh ka 24 tarik mynta u bnai Nailur, 2022, ka tnat Pulit ka la ïoh ban kurup ïa u drok heroin, u Kynja bad u Opium, ki dawai jyrhoh bad ki dawai kuli Amphetamine kiba shongdor haduh 18.33 klur.
Ka jylla baroh kawei ka dei ban ai jingïaroh ïa ka tnat Pulit kaba la shimkhia bad kaba la trei shitom ban ïakhun thma pyrshah ban pynduhjait ïa kine ki jingdih kiba sniew kiba la pynswai ïa kiba la im kyrni bad kiba long kum u shiah uba thar ïa kiba bun ki longiing longsem bad kiba la pynisaitmet haduh katta katta ïa ka imlang ka sahlang. Bun ki longing kiba la ïam kthang haba ki don ki khun ki kti lane ki bahaïing hasem kiba la im kyrni ha u drok.
Ka tnat Pulit ka la lap ba na ki 12 tylli ki District jong ka jylla Meghalaya, ka jingkhaii drok ka kham kynrei bha ha ki phra tylli ki District, kata, ha East Khasi Hills, West Khasi Hills, South West Khasi Hills, South West Khasi Hills, East Jaiñtia bad West Jaiñtia Hills, Ri Bhoi, West Garo Hills bad ka South Garo Hills.
Ka jingkylli kaba mih mynta ka long, hato, ki dorbar shnong ki leh aiu haba ki don kum kine ki jingjia kiba pynsuhjer ïa ka imlang ka sahlang? Ki kmie ki kpa ki hikai aiu ïa ki khun kti haba ki khun ki ïaid lait lan ha la ka jong ka mon ban ïakyrsum ha ka ahor manla ka sngi? Kine ki dei ki jingkylli kiba pynsngew khia bha ïa ka imlang ka sahlang bad ïa ki briew kiba don ka mon bha ban trei shitom na ka bynta kito ki lanot kiba la shah pynngop ha ka jingdih drok.
Toi, ka jingïalap bad ka jingpynshai sha ki khynnah skul bad sha ki samla pule kolej kiba dang khie dang san ban kiar raimaw raidieng na u drok ka dei kawei na ki lad ki lynti kaba suk ban pynsngewthuh da ki tnat treikam ka Sorkar. Hynrei hato, ki kmie ki kpa kiba long ki nonghikai ba nyngkong eh ki don por neem ban pynsngewthuh bad ban sneng ban kraw ïa la ki khun kti ban kiar raimaw raidieng na ki saikhum jong u drok. Wei ba la kyrni, la eh ban bthah ïa u kynjri. Ka jwat haduh katta katta, ïa kito ki lanot kiba la kyrni la ka long u drok, ka kyaid, u kynja ne ha kino kino ki jingdih kiba sniew ban lait.
Ha kiba bun ki khep, ki jingjia shah lute bad shah tuh, ki jingprong tuh ha ki dukan bad ha ki ing briew ki dei na ka daw ka jingjyllei ki nongdih drok khamtam kito kiba wan na ki longing longsem kiba kham duna ka ïoh ka kot haba ki poi ha ka kutlad kim banse ban ieng da ka tuh ka thiem tang ban pynhun ïa la ka jingkwah lajong.
Ha kane ka juk kaba ki samla lud ki ïa beh tang sha ki jingsngewbha ka pyrthei, ki kmie ki kpa ki dei ban buddien bad ban husiar bha ban pyllait lan ïa la ki khun ki kti ban leit shang suwari, ban leit party ne shang sngewbha bad la ki paralok namarba dei kine ki khep ba ki khun ki kti kin shah riam ha ka shrip ba la pynap da ki paralok ba ki shahniah bad kiba ieid thep mynsiem.
Ka tnat Pulit kam dei ban shong kli kti namarba ka jingthaw ïa ka Anti-Narcotic Task Force ha ki district bapher bapher jong ka jylla ka dei hi ka jingthmu ban ïakhun thma pyrshah ïa u drok.
Kumba ka paw hi imat, dei ka jingkhih jingksar jong u Dr. Bishnoi ba ki Pulit ruh ki hap ban trei minot ïa ka la kamram bad ka jingïoh kurup ïa ki jingdih kiba sniew kiba kot haduh 18.33 klur ka paw ba ki snem baladep ka tnat Pulit ka shu trei tang dep rukom tang haba ïoh ujor.
Naduh ba u Dr. Bishnoi u la shimti kum u DGP ba thymmai ka Jylla u la pyrshang hi dalade ban pynïajan ïalade bad ïa ka tnat Pulit sha ki paidbah da kaba leit jurip bad leit jngoh ïa ki shnong ki thaw ha kylleng ka Sor Shillong. Kane ka sienjam jong une u Khliehduh ki Pulit ka la mih ruh ka jingïaroh na ki Dorbar Shnong kiba ju kloi ban ai ka jingïatreilang bad ki Pulit ha kiba bun ki khep bad na ka por sha ka por.
