Nongstoiñ, Jymmang 19: Ka surok na Nginïong sha Mawdoh ka dei kaba donkam haduh katta bad kaba ki paitbah nongshong shnong jong kitei ki thaiñ ki la angnud la slem bah hynrei haduh mynta ym pat don surok satia.
U bah B.Nonglang sordar barim ka shnong Sawtalad (Mawdoh) haba ïakren bad u nongthoh khubor, u la ong ba ha ki snem ba mynshuwa na ka liang ki riew rangbah ka thaiñ ki la leit ban pynsngew sha ka sorkar lyngba ki ophisar ka tnad PWD.
Ki la pyrshang ruh ban leit peit ïa ka lain na ka bynta ban shna surok, hynrei ka la shu kut noh kumto khlem lah ban pynthikna la ka sorkar kan buh ne em ïa ka mang pisa na ka bynta ban shna ïa katei ka surok.
Nalor kata u la ong ruh ba lada shna surok na Nginïong sha Mawdoh, ki don ki bynta kiba hap ha ka jingpeit jong ka tnad treikam kaba don ha Nongkasen. Ka don ruh ka bynta kaba hap ha ka jingpeit jong ka Nongstoiñ Division. Na ka bynta ban shna ïa katei ka surok kitei ki tnad treikam, ki hap ban ïa sngewthuh jingmut lang na ka bynta ban pynbeit ïa baroh ki jingdonkam.
Lada ka don ka surok na Mawdoh sha Nginïong, kan pynsuk shibun ïa ki nongleit nongwan khamtam ki paitbah kiba donkam ban leit sha ki thaiñ Mawlangsu lane kiba donkam ban leit sha Shillong. Namar ka surok na Mawlangsu shaduh Markasa ka la bit la biang ba ki kali kin ïaid.
Ka bynta kaba dang sah bym pat siang rong ka dei tang naduh ka shnong Lummyrsiang haduh Mawphalur, kaba jngai tang kumba shikilomitar shiteng, hynrei wat la ym pat siang rong ruh ka surok ka la bit la biang. U la ong ruh ba ka jingjngai tang na Mawdoh haduh Rambrai ka ïa ryngkat bad ka jingjngai na Mawdoh sha Mawphanlur.
Ha kajuh ka por u la ong ba ki paitbah nongshong shnong katei ka thaiñ, ki dei kiba khlaiñ bha ha ka rep soh, rep pai, rep jhur bad kiwei kiwei nangta ki riew tymmen ka thaiñ Madoh ki dei kiba tbit bha ha ka thaiñ shylliah, thaiñ prah thaiñ shang. Kumta lada don ka surok kan long ka jingkyrkhu kaba khraw ïa ki paitbah ka thaiñ baroh kawei.
