Ka spah pyrthei ka neh tang shipor, hynrei ka spah mynsiem ka neh shi junom: Bah H.S. Diengdoh

Mawkyrwat, Risaw, 09: U bah Stalyne H. Diengdoh, uwei na ki ophisar sorkar uba la shongthait bad uba la long kum u kongsan, ha ka sngi saitjaiñ jong ka taïew u la plie ïa ka Retreat baar sngi jong ki khynnah rit bad ki khynnah samla ha St. Cyril Catholic Church Shaid Shaid, South West Khasi Hills District halor ka phang na ka kitab Phawer kaba ong, “Pynsan pynrangbah ïa u khynnah rit kumno u dei ban ïaid; Te ynda u la rangbah un ym leh da kumwei” (Phawer 22:6).
Haba kren kum u kongsan ha katei ka sngi u bah Stalyne H. Diengdoh u la pynkynmaw da kaba ong, “ka spah pyrthei kam ju neh slem bad tang shipor kajah noh hynrei ka spah ba kynja mynsiem lyngba ka jingieid ka long kaba neh junom”. Ula bynrap shuh shuh da kaba ong ba kane ka jaka ïashem lang ne ka Ïingmane Blei ka long ruh kawei na ki shlem ban saiñdur ïa ka jingim jong ki briew ne kiba ngeit ym tang ha ka jingsan jong ka jingim ha ka doh hynrei khamtam eh ka jingsan pura ha ka jinglong jingim kaba kynja mynsiem ban shakri bad ban tip khambha shuh shuh ïa U Blei.
U la ong ruh ba haba pyrkhat ïa kane kajuk kaba mynta bun kiba pyrkhat ba kumno lah ban pynïadei ïa ka kam saiñ hima sima bad ka Balang, haba ong kumne kam mut ba yn ïalap elekshon ha ki jaka mane Blei hynrei ka long ka jingshisha haba pyrkhat bha ba ka Balang kan nym lah ban long khlem ka politics (kaba mut ka jingstad ne saiñ dur ïa ka jingbha) namar na ki Balang lah ban ai ka jingkyrshan lyngba ki jingduwai, ka kamai kajih kam lah ban long khlem ka politics, ha ki jingbylla sngi ruh khlem ka politics yn nym lah ban long, ka pisa ruh kam lah ban long khlem ka politics bad baroh ki mih na ka politics, namar haba ong politics kam mut eh tang ha kata ka sngi ban jied na ka bynta kita ki nongmih khmat.
Haba kren shaphang ka jingïakynduhlang ne ka Retreat ba pynlong hynnin ka sngi saitjaiñ, u la ong ba ka long ban tei ïa ki jingmut jingpyrkhat jong ki hep kiba rit bad ki khynnah samla jong ka Balang bad kaba kham kongsan ka long ban pynrung ha ki ba kin ieit ïa U Blei, kin long kiba ïohi jngai, kin long kiba pyrkhat da ka jabieng kaba ïar namar lyngba jong ki ynsa lah ban tei ïa ka Balang, ïa ka imlang ka sahlang, ïa ka ri bad ka jaidbynriew. U la ong ruh ba ai ba lyngba kane ka jingïakynduhlang kan dei ym tang ba kin nang ïa ka pule ka puthi ne kin nang ïa ka akor ka burom hynrei ba kin nang ruh ban im ka jingim kaba pynsngewbha eh ïa U Blei. U la pynshai ruh ha ki hep kiba rit ba ka ‘Retreat’ ka dei kata ka bynta jong ka jingïakyn-duhlang ne ka jingïasyllok ba jar jar ba don ha ka ki jingïatai, ïa mir jingmut bad ïa ai jingmut mar kylliang.
Kumta u la kyntu ïa ki hep kiba rit ba kin long borabor kiba tip sngi, kiba tip-briew tip-blei, kiba kohnguh sneng bad burom ïa ki kmie ki kpa bad kiba la heh la san bad kongsan eh ba kin ïa kynmaw ba ieit bad burom ïa U Blei.
Haba kren pat ha kaba ïa dei bad ka jinglong jingman ha kine ki sngi, u Stalyne H. Diengdoh u la ong ba ka jingkren briew jong ka pisa ka la long kaei kaei kaba ma namar da ka lah ban thied lut ïa kiei kiei baroh la ka long ïa ka jingmut jingpyrkhat, ka jingim briew ne wat ïa ka mynsiem briew ruh khamtam eh ki khun jong ngi mynta ki im ruh ha kane ka imlang ka sahlang kaba dap tang da ki jingsniew kum u drok bad kiwei de ki jingdih. Namarkata, ka long kaba dei ba ki kmie ki kpa ha kum kine ki sngi ki dei ban phikir bad peitngor bha ïa ki khun ki kti namar ka jingjyllei jong ki jingsniew ka la nang kharoi bad lada ki kmie ki kpa kim lah ban tehlakam ïa la ki khun naduh dang rit kan sa poi sha ki jingeh kiba bun.
Kumta ha ka jingkren jong u u la ai jingmut ba ki jingsneng jingkraw kim dei ban long tang ha ki ïing ki sem, hynrei ha ki Balang ruh dei ban ai ki jingsneng jinghikai khnang ba ka longbriew manbriew kan nym ïap noh tang shiteng por hynrei ba kin nangroi nangsan ha ka jingbha ha ka imlang ka sahlang, ha ka Balang bad ka ri bad ka jaidbynriew da kaba u buh ruh ïa ka kyntien na ka Kotbah kaba ong, “Hikai ïa u khynnah ha ka lynti kaba dei bad un ym kylla ne kynriah noh na ka wat haba u la rangbah”.
U bah Diones Wartde uba long u nonglamkhmat ïa kane ka prokram u la ïathuh ba ka jingmut ba ngi pynlong ïa kane ka retreat ka long ba ngi kwah ban hikai ïa ki khynnah rit ba kin nang kumno ban phai dien ïa la ka jong ka jingim kaba ki la leh ha ki por ba la dep, ban pynthymmai biang ïa la ka jong ka jingim. Ki co-ordinator ne ki nongïalam ruh ki kwah ba ki khynnah kin heh ki san naduh dang rit ha kata ka jingim ba bha kumba ka kitab phawar ka ong, “Pynsan pynrangbah ïa u khynnah rit kumno u dei ban ïaid; Te ynda u la rangbah un ym leh da kumwei” (Phawer 22:6).
Ha kane ka sngi la ïoh ruh ka jingkren lyngkot na u bah Paulmiky Marweiñ bad kumjuh ruh na i heprit Gracemin Syiemlieh, President Seng Khynnah Rit jong ka St. Cyril Catholic Church Shaid Shaid.
Ban pynkut ïa katei ka jingïakynduhlang ba ar sngi ha St. Cyril Catholic Church Shaid Shaid, u Rev. Fr. Friding Kharsyiemiong, Parish Priest Nativity of The Lord Parish Mawkyrwat u leit ban khang mynta ka sngi ryngkat ka jingkyrkhu kyrdoh ba kin nang im ka jingim kaba bha bad ban long ki nongbud jong U Trai Jisu ha ki por baroh.