Ka sotti juk jong ka mynnor ka la jah na ki samla bad ka imlang sahlang: Bah T.Nongrem

Nongstoiñ, K’lyngkot, 21: “Ka long kaei kaei kaba I pangnud ban peit ïa ka jinglong jingman jong ki samla ha kine ki sngi, namar bun bah kim shem shuh ïa ka lynti kaba beit kaba ki dei ban ïaid ha ka jingim ba man la ka sngi, la ki dei ki samla shynrang ne kynthei”, ong u bah T.Nongrem uwei na ki riew tymmen na ka shnong Jaidoh West Khasi Hills, u ba dei ruh uwei na ki riew ïaleh Hill State, ha kti ha kjat ryngkat bad u (L) Maieit Hoping Stone Lyngdoh.
Haba kylli ha kano ka rukom ba u ong ba ka sotti juk bad ka mynnor, ki la jah na ki samla bad ka imlang sahlang, u bah Nongrem u la ong, “Ha ka por ba nga dang long kum u samla rit, ha man la ki shnong ki thaw, ki samla ki burom ïa kiba la kham san bad ïa ki riew tymmen bad kim ju saitlah haba ki phah ban leh ïa kano kano ka kam la ka dei ka kam ïing bad kiwei kiwei”.
“Nalorkata haba ïakynduh ïa ki tymmen ha lynti syngkieng, haba ki kren ki ju kren don akor da kaba ong Pabah, Parad, lada dei ki shynrang katba ïa ki tymmen kynthei pat ki da kynmaw ban ong Mei ïaw, mei bah, meisan bad kiwei kiwei. Hynrei ha kane ka juk mynta, ñiar eh ban lap ba ki khynnah kin kren kumta”, u la ong.
Ha kaba ïadei bad ki samla pat u la ong, “Palat mar shiteng na ki samla ha West Khasi Hills ha kine ki sngi ki dei kiba la nang la stad, hynrei na ka daw jong ka jingkyrduh kam sorkar, ka jingbym biang ka bylla ka sngi ki la sakma noh bad ki hap ban sdang da ki kam khaïi drok lane kyiad beaiñ, ka tuh ka thiem bad kiwei kiwei lada dei ki shynrang katba ki kynthei pat ki sakma ha la ka jong ka lynti kaba ki kynthei ki dei ban im”.
“Ki samla ha kine ki sngi ki donkam ïa ka jingpynsngewthuh kaba paka kumno ba kin tei ïa ka lawei jong ka jingim ka jong ki. U la ong ruh ba ka daw kaba hakhmat eh kaba pynlong ïa ki samla ba kin sakma na ka imlang sahlang, ka dei ka jingshah tangon ha ka Reservation policy, namar ka jingbun jong ki samla pule ha Khasi bad Jaiñtia ka la jan ïa ryngkat bad ka jingbun briew ha ri lum Garo baroh kawei”, u la ong.