Ka sorkar pdeng ka dei ban wanrah ki aiñ ba pyrkhing ban ïoh biang ka jingshanniah: Wailad

SHILLONG, Jymmang 19: U myntri ka tnad ka koit ka khiah u Bah Wailadmiki Shylla u la dawa na ka sorkar pdeng ban wanrah ïa ki ain kiba pyrkhing bha ban ïada na ka jingbym ïaid beit ha ka National Eligibility cum Entrance Test (NEET-UG) bad kiwei kiwei ki eksamin jong ka ri, da kaba ong ba ka jingleh bym suidniew bunsien jong ka National Testing Agency ka pynduh jingshanniah ha ki khynnah bad ki kmie ki kpa.
“Kane kam dei tang ha Meghalaya, hynrei ka ktah ruh ïa kiwei ki jylla, ka long kaei kaei kaba sngewsih haduh katta katta namar ngim ju khmih lynti satia ïa kum kane”, la ong u bah Shylla haba kren sha ki lad pathai khubor.
U myntri u la pynrem ïa ki jingjia ba dang shen ha kaba iadei bad ki eksamin ba la pynlong da ka NTA bad u la pynbor ïa ka sorkar pdeng ba kadei ban leh eiei halor kane.”Namar ba ïa kane la leh da ka National Testing Agency, nga pynrem shisha ïa kane.Nga kyntu ïa ka sorkar pdeng ba kan leh ei ei”, u la ong.
U la kdew ïa ki jingkular ba la ai da u myntri pule puthi jong ka sorkar pdeng. “Khyndiat sngi mynshwa u Myntri ka tnad pule puthi ka sorkar pdeng u la wanrah da ka kyrwoh ba nangne shakhmat yn sa leh da kaba tyngeh bad kin sa peit ba kine ki jait kam kin nym jia nangne shakhmat”, la ong u bah Shylla.
Haba kdew ïa ki lad ki lynti kiba skhem, u la bynrap, “Ka sorkar pdeng ka hap ban wanrah eiei na ka bynta ban ïoh ïa ka jingshaniah jong ki paidbah ka jylla namar kane ka la ju jia wat ha ki por ba la dep ruh kumjuh.Haba jia kum kine ki jait jingjia, ka pynduh mynsiem shisha ïa ki khynnah skul kiba thoh eksamin bad kumjuh ruh ïa ki kmie ki kpa.”
“Nga kwah ban iohi ba ka sorkar pdeng kan wanrah ïa ki ain kiba pyrkhing bha na ka bynta ban ioh biang ïa ka jingshaniah na ki khynnah skul bad ki kmie ki kpa”, u la ong.
U Shylla u la kyrpad ïa ki samla pule ba kim dei ban duh jingkyrmen hadien ki jingpynthut.
“Kaba sngewsih ka long ba kane kam dei ka sien kaba nyngkong ba kan jia, ngan kyntu ïa ki samla pule ba kim dei ban sngew duh mynsiem,” u la ong bad bynrap “Mar mar la shim khia bad nga tharai ba la dep pynbna ïa ka tarik ba thymmai.”
U la batai ïa ka jingleh test biang kum ka lad kaba ar.”Nga kyntu ïa ki ba kim dei ban ym duh mynsiem.Kane ka dei ka kabu kaba ar kaba phi ioh, trei shitom bad ngi ïa don lang halor kane”, la ong u myntri.
Katkum u Bah Shylla, ka jingdon jong ki kyrtong na Meghalaya ka la shah ktah bha. “Ki don shibun bha na ka jylla”, u la ong.
U myntri u la ong ba la buh ïa ka tarik eksamin ba thymmai na ka bynta ka NEET-UG “Ka tarik ba thymmai ba la buh, lada ngam bakla, ka dei ha ka 21 tarik u Jylliew”, u la ong.