Ka Sorkar Meghalaya kam dei ban bakla shuh ïa ka jingïapynbeit pud ha ka wat kaba ar: HYC

Shillong, Nailar, 21: Ka Hynñiewtrep Youths Council (HYC) ka pynpaw ba ka pdiang hun kylluid mynsiem bad sngewkmen ruh ba ka Sorkar Meghalaya bad ka Sorkar Assam ki la ïaid shakhmat ban ïakren pynbeit biang ïa u pud ha ka wat kaba ar.
“Ka Jylla Meghalaya ka la dap 50 snem bad ka por ka la ih bha ban pynbeit noh syndon ïa u pud u samla jong ka Jylla Meghalaya bad ka Jylla Assam,” ong u kyrwoh ba la phah da u President ka HYC u Bah Robert June Kharjahrin.
“Ha kane ka jingïapynbeit pud kaba ar ka seng ka kyntu na ki ar Sorkar ba ki dei ban kynthup noh syndon ïa baroh ki hynriew tylli ki Sector kiba dang sah kum ka Nongmynsaw (Langpih ), Block 1, Block 2, Psiar bad Khanduli, Deshdomria (Raid Khadar Bongthai), Baridua bad ka Nongwah Mawtamur bad ba ym dei shuh ban dang pynsah teng ïa kano kano ka Sector,” la ong ka seng.
“Ha ka wat kaba nyngkong, ngi la ïohi ba ka jingïapynbeit pud ym shym la bud thikna ïa baroh ki San tylli ki mat ba la ïa mynjur (Five Agreed Principles) kiba kynthup ïa ka Historical Facts, Ethnicity, Geographical Contiguity, Administative onvenience & Williness of the people. Ha ka wat kaba nyngkong ngi la ïohi ba la pynshong nongrim than eh tang ïa ka mon ki paidbah kynthup ïa ka mon ki nongshong wai bad ki nongshong thap hynrei ïa ki trai jaka ym shym la sngap shuh. Ïa ki Historical Fact bad ïa ki kot ki sla lei lei ym shym la pyndonkam ha ka jingpynbeit pud kaba nyngkong,” la kynthoh ka Seng.
“Kaba kham ithamula eh ka long ha ka wat kaba nyngkong, ïa ka jinglap bad ïa ka jingai jingmut jong ki Regional Committee na ka jylla Meghalaya ym shym la pdiang. Nalorkata, kaba sngewsih eh ka long ba ha shwa ban soi ïa ka Memorandum of Understanding (MoU) ka Sorkar Meghalaya kam shym la pyntip ne pan jingkyrshan na ki Dorbar Hima, ki Dorbar Raid, ki Dorbar Shnong bad na ka Khasi bad Jaiñtia Hills AutonomoDistrict Council. Kane ka jingleh jong ka Sorkar Meghalaya ha ka wat ka banyngkong ka la pynsngewsih ïa kiba bun bad ka Meghalaya ka la duh noh kumba 18 sqkm tam eiei ka khyndew. Da ki phew tylli ki shnong bad ki jaka jong ki Hima Khasi ki la poi noh sha Assam ha kane ka wat kaba nyngkong bad ka la pynbor ïa ki Hima Khasi ba ki hap leit shaduh Iingkashari,” la ong shuh shuh ka Seng.
“Watla ngi pdiang ïa ka jingthmu jong ka Sorkar ban ïa pynbeit pud, ngi dawa ba ka Sorkar Meghalaya kam dei shuh ban dang bakla ha ka jingïapynbeit pud ha ka wat kaba ar. Ngi kwah ban kren da kaba shai ba ka Sokar ka dei ban da pan jingmut bad ban sngap ïa ki Shnong, ki Raid bad ki Hima Khasi. Ki ar tylli ki District Council kata ka KHADC bad JHADC ki dei ban don bynta naduh kaba sdang haduh kaba kut ka jingpynbeit pud bad ka Sorkar ka dei ban da ïa pynshong nongrim bha ïa ki san tylli ki mat ïa pynbeit ym ban shu sngap beit tang ïa kaei kaba ka Sorkar Assam ka kren ne pynbor,” la kyrpad ka Seng.
“Ka jingïakren pynbeit pud ka dei ban long ha ka jingïaburom mar kylliang hapdeng ki ar Sorkar ym ban long Jeep ka Assam bad Trailer ka Meghalaya. Ka HYC ka kwah ban ïohi ba ki shnong bad ki jaka ki Hima/Elaka Khasi Pnar ki dei beit ban hap ha Meghalaya khnang ba kata ka jingïapynbeit pud ka long kaba shongkun bad kaba pynkmen ïa ki paidbah ka Bri u Hynñiewtrep,” la pynkut u kyrwoh.