Ka Sorkar Meghalaya ka dei ban kem mardor ïa ki Pulit pynïap briew ka Assam: UHM

Shillong, Nohprah, 01: Ka United Hynñiewtrep Movement (UHM) ha ka Sngi Palei ka la dawa ïa ka Sorkar Meghalaya ba ka dei ban phah kem noh mardor ïa ki Pulit ka jylla Assam kiba donkti ban siat ïap ïa ki san ngut ki nongshong shnong jong ka shnong Mukroh kaba la jia ha ka step 22 tarik, Naiwieng, 2022 ha ka shnong Mukroh, West Jaiñtia Hills District.
Ka seng ka la pynsngew ïa kane ka jingdawa lyngba ka dorkhas ba ka la aiti ha u Symbud Myntri Rangbah ka Jylla u Bah Prestone Tynsong.
Ha ka jingïakren bad ki lad pathai khubor u President ka UHM, u Bah Charlie J. Rani u la ong, “ngi pynrem jur ïa ki Pulit ka Jylla Assam bad ïa ki nongap pahara khlaw kiba la siat ïap ïa ki nongshong shnong ba luilui jong ka shnong Mukroh kiba mih ban pyrshah ia ka jingthombor jong ki Pulit Assam ia ki nongshong shnong ha ka 22 tarik, Naiwieng, 2022.”
“Ngi dawa ia ka Sorkar Meghalaya ba ka dei ban kem mardor ia ki lehnoh phong Uniform (Pulit Assam bad nongap pahara khlaw) bad ban wanrah sha ka Jylla Meghalaya khnang ban dup ïoh pynlong ia ka jingtohkit kaba khuid. Lada lap ba ki dei kiba donkti, dei ban pynshitom katkum ki kyndon aiñ halor ki kam riewkhlaw jong ki,” la dawa ka Seng.
“Ngi pynrem jur ia kane ka kam riewkhlaw jong ki Pulit ka Assam bad ngi dawa ba ki san ngut ki nong shong shnong baluilui jong ka shnong Mukroh ki dei ban ïoh ia ka hok,” u la ong.
“Ngim hun ia ka jingpynshai da ka Sorkar Assam hynrei ngi dawa ba dei ban thung ia ka jingtohkit ym da ka tnat tohkit jong ka Sorkar Jylla hynrei da ka tnat tohkit jong ka Sorkar Pdeng, kata da ka National Investigation Agency (NIA) khnang ban sei madan ïa ki jingshisha halor ka jingjia bad ban pynïoh ruh ïa ka hok jong kiba la mynsaw jur ha ka jingshah siat kuli khnang ba ki paidbah ka jylla Meghalaya kin tip ïa ki jingshisha baroh,” la bynrap u Bah Rani.’
Ka UHM ka la dawa ruh ïa ka Sorkar ba ka jingsiew bailutksan kaba tang T.5 lak kam pat ïarap eiei ruh em namarba ki bahaïing hasem jong ki san tylli ki longing ki la duh noh ïa u kpa/u nongbsa bad dawa ruh ba ka pisa kaba la mang ban pynlut ha ka tamasa Cherry Blossom Festival dei ban siew lut sha ki longing jong ki san ngut ki lanot bad sha ki arngut ki lanot.
“Dei ruh ban thungkam Sorkar manla iwei na ki bahaing hasem jong ki san ngut ki lanot khnang ba kin dup lah ban kyrshan ïa la ka ing iing ka sem,” la dawa ka UHM.
Shuh shuh ka UHM ka la dawa ba ka Sorkar ka dei ban buh ïa ka Border Out Post ha ka shnong Mukroh ym ha ka shnong Barato khnang ban ïada bad ban ai jingshngaiñ ïa ki paidbah.
Ka Seng ha ka sngi Balang ka buddien ïa ka jingjia ha ka shnong Mukroh da kaba aiti ïa ka dorkhas ha dkhot jong ka Meghalaya Human Rights Commission (MPHRC) u Bah Peter James Pyngrope Hanaman khnang ba ka Commission kan pynlong ïa ka jingtohkit kaba bniah halor ka jingshah siat ïap ki san ngut ha ka shnong Mukroh ha ka 22 tarik, u bnai baldep ha ki ktang suloi jong ki Pulit Assam.
U Bah Charlie Rani u la ong ba ka seng kan ïai buddien ïa kane ka kam tad haduh ba ki san ngut ki lanot ka shnong Mukroh kin da ïoh ïa ka jingbishar kaba hok bad ba kito kiba dkhat jubor ïa ka jingim jong ki ki dei ban ïoh ka jingshah pynsaja kaba tyngeh.
U la ïathuh ba u Bah Hanaman u la ïathuh ba namar ka Sorkar ka la thung da ka Judicial Enquiry Commission, ka MPHRC kan ym lah shuh ban pynlong la ka jong ka tohkit halor kane ka jingjia hynrei u la shu ai ka jingkular ba phah ïa ka dorkhas jong ka seng sha ka Sorkar Jylla ba ka jingtohkit kaba kin pynlong lyngba ka commission ba ki la thung kan long kaba janai.