Chokpot, Nailur 24 : U Myntri Rangbah ka jylla u Conrad K Sangma u la ong ba ka sorkar MDA kam ju pynkheiñ ïa ki jingkular ïa ki paidbah bad ïa kiei ki juban lak ba la khlei hakhmat ki paidbah ka ïai pyndep beit.
ïa kane ula kren mynta ka sngi ha ka jingplie ïa u maw nongrim ban shna ïa ka surok ba 35 Km naduh 12 Mer, Tura -Dalu shaduh Chokpot. Nalor kane ula plie ruh ïa u maw nongrim na ka bynta ban shna ïaka ophis jongka Chokpot Civil Sub Division, South Garo Hills.
Haba plie ïa kine ki maw nongrim jong kine ki ar tylli ki projek ba donkam, u Myntri Rangah u la ong “ Nga dap da ka jingkmen kaba khraw ba ka sorkar ka la lah ban pyndep ïa ki jingkular ïa ki paidbah khamtam ba kine ki kam ki dei kiba la ïai sahteng la slem slem bah. Ka sorkar ka la mang 50 klur ban shna ïa kane ka surok ba thymmai bad 4 klur ban shna ïa kane ka ophis Sub Division ba thymmai.
“ Ngi ïai trei ryngkat bad ka thong ban wanrah ïaka jylla kawei na ki 10 tylli ki jylla ba wan hakhmat tam hapoh ka ri ha kine ki 10 snem ban wan namar kumba long mynta ka jylla ka la kiew sted bha haki liang ka roi ka par” ong u Myntri Rangbah.
U la ong ba ka sorkar ka trei shitom bad da ka mynsiem ba sngew skhem kan wanrah ka jingkylla kaba khraw ha ka jylla. “ Nga kwah ban ïohi ba ym don kawei ruh ka bynta ne ka thaiñ hapoh ka jylla ki ban shah leh klet ne sahdien namar ka thong jong ngi ka sorkar ka long ban wanrah ka jingroi jingpar sha baroh” ong biang u Conrad.
“ Ngim kwah ban ïohi ïa kata ka roi ka par tang ha nongbah Shillong bad Tura hynrei ha baroh ki jaka hapoh ka jylla khamtam eh sha ki thaiñ nongkyndong” ong u Conrad K Sangma.
U la ong kumba 80 % ki nongshong shnong ki im ha ki thaiñ nongkyndong kumta lada ka jylla ka dei ban kiew dei shwa ban sdang na ki thaiñ nongkyndong bad baroh ki jaka hapoh ka jylla ki dei ban ïakiew lang ha ki liang baroh.
U la kren bynniaw shi katdei eh ba ka Chokpot ka dei kawei na ki thaiñ ba dang sahdien tam wat hadien 50 snem ba la ïoh ïa ka jylla ba pura ruh. “ Ka sorkar jongngi kan ym ieh khun swet ïa ki jaka nongkyndong bad kan ïai trei ban kyntiew ïa ki. Ngin pynthikna ba ïa ka jingthrang ki paidbah yn lah ban pyndep lyngba ki projek bad ki skhim bapher bapher” ong biang u Myntri Rangbah.
Halor ka jingtei ïaka ophis SDO ba thymmai, u la ong ba kane ka ïing ophis kan ai ka jingshakri ba paka sha ki paidbah namar ka sorkar ka la buh thong ban wanrah ïa ki kam pynroi bapher bapher na kane ka ophis sha baroh ki block.
U la ïathuh ba wat ïa ka ophis ba thymmai ka Chokpot Block ruh la dep mang pisa da ka sorkar. Kiba la ïadon lang ki long u MLA ka Williamnagar u Marcuise Marak, MLA Siju Rongara u Rakkam Sangma, CEM ka GHADC u Albinus Marak, Dy CEM GHADC u Nikam Marak bad kiwei kiwei.
