Jowai, Ïaïong 19: U Symbud Myntri Rangbah ka sorkar jylla u ma Sniawbhalang Dhar haba ai jingkren haka jingïalang plie mawnongrim ïa ki project bapher bapher ha Wahiajer, ha kane ka sngi saitjaiñ, ula ong hapoh ka jingïalam ka sorkar MDA-II kala trei salonsar khlem da ñiew shilliang ha baroh ki 60 tylli ki Constituency, naka bynta ki kam pynroi naduh ka koit ka khiah, ki surok, ki kam jngohkoi pyrthei, ka umbam umdih nalor kiwei de.
Ka sorkar MDA-II ha ka jingïaid lynti kaba yn kynjoh noh sha ka 8 snem, lada ïa nujor ha u snem 2018 ka mang tyngka jong ka sorkar ka long tang 9 hajar klur tyngka bad mynta kala poi sha ka 32 hajar klur tam.Dei ha kane ka nongrim u ong ‘ka sorkar kaba treikam dei kaba shah kren, hynrei tang ka sorkar kaba thiah sngi kaba ym don kiba kren ïa ka’.
Ula ong shen ka sorkar India kan sa plie ïa ka projek ban tei thymmai ïaka surok 4-lane High-Speed Corridor 166.80 km (NH-6) na Lad Umroi (Shillong) sha Silchar (Assam) kaba la kot 21,800 klur tyngka bad kane ka surok kala ïaid najan kane ka thaiñ Wahiajer bala pyntrei ïa u surok 4-lane.
Ha kaba ïadei bad ka projeck Lumpongdeng ula ong ‘mynta ki don kiba shah thngan ban pyrshah ïa ka project, halor kane ula dep ïakren bad u Myntri Rangbah lada don kiba pyrshah ula kyntu ban wanrah ïaka sha ka thaiñ Wahiajer kaba pdiang sngewbha ïa ki kam pynroi.
Shuh shuh ula ong ‘Ki don kiba shah thngan ban kwah kam pynroi bad ki don kiba shahthngan ban beh pynban ïa ki kam pynroi.
Ka National Games-2027 kaba la wanrah shapoh ka jylla ka long ka jingsngewsarong ïa ka jylla hi baroh kawei bad kine baroh dei ka jinglah u Myntri Rangbah ban pynïadei bad ka sorkar India, “Phi la pyrkhat ne em ba ka jylla kaba don tang 38 lak ngut ki nongshong shnong bad mynta kala pynïoh surok ha kylleng ki jaka kaba la kot da ki phew phew hajar klur, kumjuh ka sorkar kala wanrah ruh ïa ki tamasa bapher bapher ban pynpaw nam ïaka jylla da ka jingwan poi ki nongrwai ba paw jong ka Ri ka pyrthei” ong ma Sniawbha.
Kum ki nongïalam haka saiñ hima sima ula pynsngew ‘dei ban don bynta ha baroh ki liang la haka ñiam ka rukom, ka rwai ka siaw bad ha kiwei de namar ka por ka don ïa kiei kiei baroh ha ka jingim briew’.
Ula pyntip ha kaba ïadei bad ka New Shilliong ki kam pynroi mynta kiba la ïaid bha shakhmat khlem sangeh haki 24 kynta kiba la kot da ki hajar klur tyngka, kine baroh ki dei lyngba ka sorkar MDA hapoh ka jingïalam ka NPP.
