Ka Sorkar kan ym ailad ïa ki nongdawa pisa kiba pynkiewdor ïa ki marbam: Conrad Sangma

Shillong, Nailar, 26: U Myntri Rangbah ka Jylla u Conrad Kongkal Sangma ha ka sngi Thohdieng u la ïaroh ïa ka tnat Pulit bad ïa ki bor synshar jong ka West Khasi Hills District kiba la ïakhun pyrshah ïa ki kam be-aiñ kiba la pynkiewdor ïa ki marbam mardih bad kiwei kiwei ki jait mar ha rilum Garo.
“Dang shen ki Pulit bad ki bor synshar ka West Garo Hills Police ki la khynra naphang ïa ki kam be-aiñ, khamtam eh ha kaba ïadei bad ki nongkhrong pisa kaba la pynlong ïa ki marbam mardih ban kiewdor,” ong u Conrad.
Ha u kyrwoh ba la phah sha ki lad pathai khubor u la ong, ba ïa kane ka jingkhynra jong ki Pulit la leh na ka bynta ka jingmyntoi jong ki paidbah kiba la jynjar na ka daw ki kam be-aiñ ba la leh da ki katto katne ki kynhun bad ki riewshimet kiba donkti ban pynkiewdor ïa ki marbam mardih.
U la ong ba ki marbam ki dei ki bynta kiba hakhmat eh jong ka Sorkar ban pynthikna ba ki paidbah kim dei satia ban shah shukor namarba ki dei ki jingdonkam ba manla ka sngi.
“Hadien ba la ïoh ïa ki tyllong jingtip ki bapher bapher, ki Pulit ka District bad u Superintendent of Police, ki la shim ïa ki sienjam kiba tyngeh ban pynthikna ba kum kine ki jingjia kin ym jia shuh nangne shakhmat ha ki sngi ki ban dang wan,”ong u Conrad Sangma.
“Nga kwah ban pynthikna ba ki nongkhaii bapher bapher bad ki nongshong die dukan ba ki bor synshar district, ki pulit bad ka Sorkar baroh kawei, kin ai jingkyrshan bad ban pynthikna ban ai jingïada khnang ba kum kine ki kam be-aiñ bad ki kam dawa pisa kin ym jia shuh kat haduh ba ka la pynlong ïa ki marbam mardih ban kiewdor bad ktah kylla pat ïa ki paidbah,’ u la ong.
Ki kam be-aiñ da ka kynhun ba shu la thaw hi ka Meghalaya Chamber of Commerce Organization da u MDC ka BJP uba la shah kem u Bernard N. Marak la lap lyngba ka jingtohkit ba ka dei kaba donkti ban pynkiewdor ïa ki marbam namarba ka la shu pynbor ïa ki nongkhaii ban pynkiew ïa ka dor jong ki marbam, ki tiar shna iing bad kiwei kiwei, da kaba dawa pisa na kawei pat kawei ka mar.
Ïa kane ka kynhun kaba la leh donbor halor ki paidbah ka Tura bad ka West Garo Hills la lap da ki Pulit hadien ba ki la pynlong ïa ka jingtohkit kaba bniah.
“Kane kan ktah shikatdei eh na ka daw ka jingkiewdor bad kaba ktah ruh ïa ki duk ki suk bad ïa ki paidbah nongshong shonng jong ka Tura bad ka West Garo Hills,” la ong u Sangma.