Shillong, Ïaïong 11: U Symbud Myntri Rangbah ka jylla uba khmih ïa ka tnat ki kam Pohïing u Bah Prestone Tynsong ha ka sngi Thohdieng u la ong ba kam don ka jingkylli ba ka sorkar ka pynbor ïa ki briew ban pynrung kyrteng Aadhaar.
Haba kyntait ïa ka jingïakhih pyrshah Aadhaar kaba dang shen u Bah Tynsong u la ong, “Nga la ïohi dangshen ba ki la don katto katne ki briew ki pyrshah ïa ka, ngam lah ban kren pyrshah ïa kane. Lada kim kwah ban ïoh ki lad jingmyntoi ba la ai da ka sorkar jylla bad ka sorkar pdeng ka shong ha ki. Ngim lah ban pynbor ba ki pynrung kyrteng na ka bynta u Aadhaar card lada ki sngew ba kam long kaba kongsan na ka bynta jong ki.”
Haba ong ba kane ka kam ka dei kaba la rim, u Symbud Myntri Rangbah u la ïathuh ba ki paidbah mynta ki la sdang ban leit leh bad pynrung kyrteng da lade na ka bynta u Aadhaar.
“Shah ba ngan ïathuh ba ha ka por ba sdang ki briew ki la tieng bha bad ki la pyrshah ruh ïa ka jingdonkam ban leh Aadhaar card hynrei ha kine ki por kiba mynta ki paidbah da ka mon la jong ki la leit ban pynrung kyrteng bad ban ïoh ruh ïa ki Aadhaar card,” u la bynrap.
“Kadei na ka daw ba wat ha ki admission ha ki jaka pule bapher bapher donkam ban ai lang ïa u Aadhaar card bad wat ha ka jingsam khaw rashon ruh donkam ban don Aadhaar card bad wat ha ki jingdonkam ban ïoh bailutksan ha ki kam sumar donkam ïa Aadhaar card,” bynrap u Bah,” Tynsong.
