Ka sorkar kam dei ban ïakren bad ki Harijan la dei ban shu pynkynriah beit na Them ïew Mawlong : Ardent

Shillong, Iaiong 30 : U President ka Voice of the People Party (VPP) uba dei ruh u MLA ka Nongkrem u bah Ardent Basaiawmoit u la ong ba ka sorkar kam dei ban ïakren bad ki Harijan ki bym dei ki nongtrei jongka hynrei ka la dei ban shu pynkynriah beit ïa ki nongtrei jongka sha ka jaka ba la pynkhreh bad rai ban pynkynriah.
U la buh ka jingkylli ïa ka jingshim rai jongka sorkar ban ïakren ïa ka kynhun kaba lai halor kane ka jingrai pynkynriah ïa ki Harijan na Them Iew Mawlong.
“ Nga sngewlyngngoh balei ba ka sorkar ka shah ïa kata ka kynhun ba lai ban wan mushlia hapdeng halor kane ka kam” ong u bah Ardent.
U la pynkynmaw ba kine kiba sah ha Them ïew Mawlong ki dei ki nongtrei ka sorkar kumta u la ong “ Ha ka jingshisha ka sorkar kam dei ban ïa pynlut por halor kane ka kam bad ym donkam hi ruh ban ïakren bad kata kawei pat ka kynhun ka la dei ban shu shim ne pynkynriah tang ïaki nongtrei jongka bad ïa kiba sah beaiñ la dei ban shu weng beit bad balei hi ruh ka sorkar ka shah ia kita kiba sah beaiñ ban sah ha katei ka jaka jongka”.
U la ong ka sorkar ka la pynkhreh bha ïa ka jaka ban pynkynriah ïa ki bad kum ki nongtrei sorkar kim don bor ban kyntait hynrei ban pdiang beit ïa ki rai ka sorkar.
Kane ka jingther tyngeh u bah Ardent ka la long halor ka jingkyntait jong ka Harijan Panchayat Committee (HPC) ïa ki jingtyrwa jongka sorkar ban pynkynriah ïaki 3432 tylli ki long ïing na Them Iew Mawlong sha ka jaka jongka Shillong Municipal Board.
Ka HPC ha ka jubab ba 6 sla ba la phah sha ka sorkar ka la kynnoh ba kane ka jingtyrwa jongka sorkar ka long ka bym biang, kaba duna bad ka bym dei kat kum ka lynti jongka riti synshar paidbah. Ki don bun ki jingbakla bad ki bym pynhun bad khamtam ki rukom leh jongka High Level Committee jongka sorkar Meghalaya.
Shwa ba ka sorkar kan pynkhreh ïa ka blue print jongka nyngkong eh ka sorkar ka la kyntait ïa ki jingdawa jongka HPC ban ai mar 200 square meters ka jaka sha ki 342 tylli ki long ïing bad ban pynshna ïing ruh ïa ki ha ka jaka ba hap hapoh ka European Ward.
Haba kylli, u bah Ardent u la ong “ Balei ka sorkar kan hap ban ïakren bad ki nongtrei jongka. Ka sorkar ka la dep rai ban pynkynriah ïa ki kum ki nongtrei jongka bad kumta kim lah ban kyntait bad ong ba kim kwah ban mih hynrei ka daw ka dei ba bun kiba sah ha katei ka jaka ki dei kiba sah beaiñ suda”.
U la ong ka por ka la dei mynta ba ka sorkar kan sdang da ka kam kata ban leh da kaba tyngeh ïa kito kiba dang bteng ban shah ia kitei ki briew ban sah ha katei ka jaka sorkar. U la ong ba ka sorkar ka la shah jem shaba palat halor kane ka kam bad ka lah ban long lehse ba ki don bun ki riewsaiñ pyrthei kiba pyndonkam bakla ïa kitei ki briew ne jaka kum ka vote bank jongki ruh.
Kumta u dawa ba ka sorkar ka dei ban shim ïa ka rai kaba khatduh kloi katba lah ban pynkynriah noh ia kitei ki briew. “ Ka sorkar kam dei shuh ban dang ai daw ha kane ka kynti. Ka sorkar kala pyrshang ïa kaba bha tam kumta kam dei shuh ban dang sngap ïa kito kiba ym kwah ban mih ne kynriah ka sorkar ka la dei ban pyndonkam noh da ka bor lada donkam” ong u bah Ardent.
Halor ka jingkylli hato ka VPP ka pdiang ïa ka blueprint jongka sorkar, u bah Ardent u la ong “ Ngim shym la ong ba ngi pdiang bad mynjur ïa ka blueprint shispah na ka shispah hynrei ngi pdiang ïa ka jingpyrshang ka sorkar ban pynkynriah ïa ki namar ka sorkar kam shym la rai ban ïeh ïa ki ha surok hynrei ka la pynkhreh ïa ka jaka ban pynkynriah ïa ki. Kum ka sorkar ka dei hi ban shim khia ban peit ïa ki nongtrei jongka bad kumba la rai ban pynkynriah kumta ki ruh ki dei ban pdiang ïa kata”.