Ka Sorkar ka pyrshang ban thied ïa ki sengbhalang, ban ïoh tih Uranium, hynrei ka khang tih maw tih shyiap

Nongpoh, Nailur 15: U Bah Sadon K Blah President ba rangbah jong ka Hynniewtrep National Youth Front (HNYF) u la ther tyngeh ïaka sorkar jylla bad ka sorkar India ban khang tih maw tih shyiap bad wat u dewiong hynrei ka pyrshang ban thied ïaki sengbhalang ïaki Executive Member jong ka KHADC, ki MLA ki Minister ban ïoh tih ïa u Uranium ha Domiasiat, West Khasi Hills.
Haba pynskhem ïaki nongkitkam ba thymmai bad ba pura jong ka HNYF kaba la long ha Umsning auditorium u Bah Sadon u la ong ruh ba ka sorkar India ka don ïaka jingmut ban khñiot syndon ïa ka jaitbynriew, kam ailad ïaki paidbah ban tih maw tih shyiap (traditional mining) watla ïa u dewiong hap ban pyrkhat da kumwei hynrei ka don pat ka jingmut kliaw ban tih ïa u uranium da kaba pyrshang ban thied da ka pisa ïa ki kynhun sengbha-lang, ïaka District Council bad wat ïaka sorkar namar u uranium ba don haka jylla jong ngi u dei uwei naki ba bha tam.
U la ïathuh ruh haba wan ki heh na UCIL ban ïakren, kila pynbiej da kaba ong ba ki shu tih ïa une u mar poh khyndew naka jylla bad kin saiñ pat sha kawei ka jaka bad kular ruh ban ai kam 30 snem ïa kito ki trai shnong bad kiba shah ktah na ka jingtih uranium, hynrei naka liang utei u nongïalam u ong ba 30 snem ka dei ka por kaba lyngkot eh, shaei pat ka lawei jong ki paradoh parasnam ba shong basah ha kato ka jaka.
Utei u nongïalam u la kren shai ruh ïaka nongrim jong ka HNYF ba ka dang ïeng haduh mynta halor ka Instrument of Accession bad ka jingleh bor ka sorkar India kaba la shu thmu ban iuhroit ïaka jaitbynriew da kaba pynap da ki ktang suloi ban pynbor ban long ki nong India khlem da burom ïaka Instrument of Accession (IoA) kaba la dep ïasoi hadien ka jingsynshar jong ki phareng.
“Ngi dei ban sngewthuh ba ka jaitbynriew hynñiewtrep kam dei ka jaitbynriew ba shah teh mraw haka por ba synshar ki syiem muslim hapoh ri india kam dei ka jaitbynriew kaba long nong India naduh kato ka por bad wat hadien ba synshar u phareng ruh ngi khlem ïasoh bad ka ri india, hadien bala ieh ïaka ri india haki snem 1947-1948 ki khlieh nongsynshar kila soi da ka Instrument of accession kaba ngi ia pdiang katkum ka dulir bad ki don 3 tylli ki kyndon haka Annexed Agreement ba ka sorkar India ka lah ban shna aiñ kata ka long ban pyniasoh bad ka ri india lyngba ki surok ki lynti ki syngkien, kaba ar katkum ka annexed agremment ka long ba ngi mynjur ban pyndonkam kajuh ka pisa bad ka ri India, bad kaba lai kaba ong ba lada don kano kano ka jingshah thombor ne ka jingshah lehbor, ngi mynjur ban ïatreilang bad ka sorkar India kum ka common defence.
Bad la mynjur tang 2 snem haka standstill agreement, hynrei kaba sngewsih ka long ba kata ka 2 snem kat pat kut ka sorkar India kala hiar thma ïangi kala pynap da ki tup da ki man ïaki khlieh nongsynshar kiba ieng halor ka nongrim jong ka Instrument of Accession bad ïangi la pynlong nong India jubor da ka jingshah byrngem byrsit.
Kum ka HNYF haduh mynta ka dang ïeng haka nongrim jong ka IoA ba dei ban khyllie biang ïaka dulir bad lada dei ban ïasoh bad ka ri India ruh dei ban pynïasoh da ka jingsngewthuh jingmut ym ban shu pynbor, u la bynrap.