Katkum ka jingïathuh jong u Myntri ka Sorkar Jylla u Bah Paul Lyngdoh ha ka sngi Baar ba ka jingbun briew tang ha nongbah Shillong ka long palat 6 lak ngut bad ki don pat tang 11 tylli ki Village Defence Party ha ki shnong kiba hap hapoh ka jylli jong ka nongbah Shillong.
Ki don da ki phew tylli ki shnong tang hapoh nongbah Shillong. Ka jingbym pynkha ïa ki Village Defence Party katkum ba la pynkupbor da ka Sorkar lehse ki bun ki daw lehse na ka jingbym ïohi jngai jong ki nongïalam shnong bad kiba sngewdei ban don tang ki seng samla bad ki seng kynthei ban ïatynrong lem ïa ka khia ka shon hapoh ka shnong ka thaw.
Na ka jingjyllei shaba palat ki nongdih drok hapoh ka nongbah Shillong ka la pynlong ïa ka Sorkar ban phaikhmat sha ki Dorbar Shnong ki ban ai ka jingïatreilang da kaba bthah ruh ban thaw ïa ki Village Defence Party hynrei ki dang bun ki shnong ki bym pat lah ban thaw ïa kane ka kynhun kaba lah ban ïatreilang bad ka tnat Pulit na ka bynta ban khanglad ïa kiba pynkheiñ ïa ki adong synshar shnong, ban khanglad ïa ki kam runar ruser, la long ha ka tuh ka thiem, ki kam bymman, ka jingïohkem ïa ki nongkhaii drok ne ki nongdih drok bad kiwei kiwei ki jait kam kiba buh jingsyier ïa ka imlang ka sahlang ha ki shnong ki thaw.
Ki Dorbar Shnong ki dei kiba la ithuh da ka riti synshar jong ka ri India namarba ki Rangbah Shnong ki hap ban shim ïa ka Sanad na ki Syiem kiba la ïoh ïa ka bor ka iktiar na ki Autonomous District Council hapoh ka United Khasi Jaiñtia Hills Autonomous District (Appointment and Succession of Chiefs and Headmen) Act, 1959. Ki Dorbar Shnong ki don ka kamram kaba khraw bha ban pynïaid ïa ka synshar ka khadar ha ki shnong ki thaw da ka jingïatreilang bad ki tnat treikam jong ka sorkar. Namarkata, ki VDP ruh ki dei ban long ka kti ka mon bad ka kti ka diang jong ka Dorbar Shnong ban ïada ïa ki paidbah nongshong shnong na kino kino ki jingma kiba lah ban wan jia ha ka por ka bym poi pyrkhat.
Ym lah ban len ba ka jingthaw ïa ki Seng Kynthei, ki Seng Samla bad ïa ka VDP ki dei tang ki kynhun trei mon sngewbha ki bym ïoh jingsiew eiei ruh em. Hynrei ka Sorkar ka la pynshlur ban thaw ïa ki VDP da kaba kular ruh ban ai jingïarap pisa na ka T.800 sha ka T.3000 hajar ha ka shi snem. Ka jingtyrwa jong ka Sorkar ka ïohi ba ka jingdon jong ki VDP ka long kaba kongsan bha khamtam ha ka mishon ïakhun thma pyrshah ïa u drok hadien ba ka Sorkar ka la pynbna ïa ka Drug Reduction, Elimination and Action Mission (DREAM).
Ka aiñ Prevention of Illicit Traffic in Narcotic Drugs and Psychotropic Substances Act (PITNDPS Act) ba la thaw da ka Sorkar India ha u snem 1988 ka long ban khanglad ïa ka jingkhaii tuh ïa u drok ha ka ri bad ki nongkhaii drok kiba shah kem ki ngat ha ki kyndon kiba eh. Hynrei haduh mynta ki dang don tang 6 ngut ki snar nongkhaii drok kiba la shah pynngat ha ka PITNDPS Act.
Lada ka mishon jong ka Sorkar Jylla ka long ban pynduhjait ïa u drok kumba pynkdiah ïa u budlum jong ki seng lehnoh ha ki snem baladep ka ladei ruh ba thoh sha ka Sorkar Pdeng ba kan buh noh ïa ka Regional Office jong ka Narcotics Control Bureau (NCB). Ka daw ka long, ban kem ïa ki snar nongkhaii drok kiba kham heh khnang ban khanglad ïa ka jingpoi jong u drok sha ka kti ki samla kiba dang khie dang san. Ki longiing ki lynniar haba ki khun ki ngop ha u drok bad khamtam ha ki jingpang HIV/AIDS. Kine ki jingjia ki long ruh ki daw kiba pyntroin ïa ka imlang ka sahlang lada ym phikir bha ïa la ka jingim namar ka jingsngewbha kaba tang san minit ka wanrah ïa ka jingbabe kaba shirta jingim bad ka long kum ka sohkhliang ka bym lah shuh ban pyndam.
