Shillong, Lber, 10: Ka Myntri jong ka Sorkar Jylla kaba khmih ïa ka tnat Agriculture & Farmers’ Welfare Dr. Ampareen Lyngdoh ha ka Lah Sngi u Blei ka la pyntip ba ki don ki skhim ka Sorkar kiba ïarap ban pynïoh ïa ki nongrep ha ka dor kaba jem kum ka sboh, ki dawai pynïap khniang bad ki symbai sha ki nongrep jong ka West Garo Hills District.
Haba ai jubab ha ka Dorbar Mang Tyngka, ka Dr. Ampareen ka la ong ba ka jingdon mynta jong ki mar rep ba la ai jingïarap ha ka distrik ki long ki mar rep kiba seisoh bha ha kaba ki nongrep ki lah ban ïoh ïa kine ki mar rep ba la ai jingïarap lyngba ki ki shnat treikam jong ka tnat.
Ka la pyntip ruh ba ka Sorkar ka la ïakhun ban pynjanai ïa ka jingpynpoi ïa ka um sha ki lyngkha rep ban kyrshan ïa ki nongrep, khamtam ha ki bnai ba rang tyrkhong ka suiñ bneng.
Ka tnat ka la ai jingïarap 21 Units ki kor synreit um bad 140 tylli ki pump set ha ki 7 block jong ka West Garo Hills sha ki 140 ngut ki nongrep hapoh ka per drop mre crop (PDMC scheme), ka la bynrap.
Related Posts
Lyngba ka FOCUS scheme, ka Dr. Ampareen ka la ong ba ki nongrep kiba dei ki dkhot jong ka producer group ki ïoh pdiang ïa ka jingïarap pisa kaba T. 5000 uwei u nongrep kum ka jingkyrshan pisa ban ïarap ha ki kam rep bad ban kyntiew shuh shuh ïa ka jingpynmih ïa ki mar rep.
Ka Pradhan Mantri Kisan Samman Nidhi Yojana (PM-KISAN) ka la ai jingïarap pisa T. 6000 shi snem sha ki nongrep kiba don ïa ki jaka rep lajong, ïa kaba la siew lai bynta, la ong ka Dr. Ampareen bad bynrap ba ka Pradhan Mantri Fasal Bima Yojana (PMFBY) kaba ïarap ïa ki nongrep ban thied mar rep bad kaba ïarap ruh ïa ki nongrep haba ki mad ïa ki jinglynshop ki bor ka mariang. Ka Sorkar Jylla ka la siew ruh ïa ka bhah jong ki nongrep ban pynduna ïa ka jingkit bakhia jong ki nongrep.
Ha kaba ïadei bad ka Kisan Credit Card (KCC), ka Myntri ka la ong ba ïa ka Interest Subvention Scheme jong ka KCC la ai jingïarap pisa ha kaba ki nongrep ki ïoh pdiang 4% ka Interest Subvention na ka Sorkar nalor ka 3 % ba ki ïoh na ka Sorkar India.
Ka la ïathuh shuh shuh ba ki District Agriculture Office ki ai jingïarap ha ka dor bajem ïa ka sboh, ki dawai pynïap khniang bad kiwei kiwei na ka bynta ki nongrep kiba rep khlem pyndonkam ïa ki dawai sboh.
Ka District Horticulture Office ka pyntreikam ïa ka Mission Organic Value Chain Development for North Eastern Region (MOVCD-NER) scheme bad ïa ka Meghalaya Organic Mission ha West Garo Hills ha kaba 10 tylli ki seng jong ki nongrep ki ïoh ïa ka Organic Certification na ka bynta 4,500 hektar ka jaka rep.