Shillong, Rymphang, 02: Ka Bharatiya Janata Party (BJP) ka la dawa ïa ka Sorkar Meghalaya Democratic Alliance (MDA) ba ka dei ban da ai ïa ka jingpynshai kaba bniah halor kano ka nongrim ba la pynjlan ïa ka samoi treikam jong ka Khasi Hills Auotnomous District Council (KHADC) bad ka Jaiñtia Hills Autonomous District Council (JHADC) sa hynriew bnai.
Ka Sorkar Jylla ha ka sngi Thohdieng ka la pynjlan ïa ka samoi jong ka KHADC bad ka JHADC halor ka nongrim ba kine ki ar tylli ki Council ki la kyrpad ban pynjlan ïa ka jingaipor ïa ki Delimitation Committee.
Ha u snem 2023, u Lat ka Jylla u la aibor ïa kine ki ar tylli ki Autonomous District Council ba kin thaw ïa ka Delimitation Committee ban pynbeit ryntih ïa ki MDC Constituency jong kine ki ar tylli ki council katkum ka jingdon jong ki nongshong shnong.
“Ngi la ïohi ba ka Sorkar ka la pynjlan ïa ka samoi treikam hynrei kam don pat ka daw kaba shongnia. Katkum ka jingtip jong nga, ngi lah ban pynjlan ïa ka samoi treikam jong ka District Council hynrei ka dei ban da don pat da ka nongrim kaba shongnia kum ka “Emergency,” la ong u Chief Spokesperson ka BJP Meghalaya Pradesh Bah M. Kharkrang ha ka jingïakren bad ki lad pathai khubor.
“Hangne ka Sorkar kan hap ban pynpaw halor kaei ka daw, ka dei kaba don ka daw kaba shongnia,” u la ong.
“Hato ka Delimitation Committee ka lah mo ban pyndep ïa ka kamram hapoh hynriew bnai. Ïa ka Committee la thaw la slem bha bad kam don kano kano ka jingtreikam bad shu buh lada phim lah ban pyndep hapoh hynriew bnai kaei ka ban jia,” la buh jingkylli u Bah Kharkrang.
“Hato ka don ka Eemergency ne kam don, kata ka dei ka jingkylli,” u la bynrap.
“Ki paidbah ki kwah ban tip na ka Sorkar kaei ka Emergency ne ka jingdonkam kyrkieh. Kiei ki jingdawa ba kyrkieh kiba long ka daw ban pynjlan ïa ka samoi treikam jong ki District Council. Mynta phim lah ban pynjlan ïa ka samoi treikam jong ki tang na ki katto katne ki daw barit. Ka dei ban don ka daw kaba shongnia. Hynrei ngi eh ïa kata ha ka Sorkar ba kan ai jingpynshai,” la kynthoh u Bah Kharkrang.
“Mynta lada ka Sorkar ka sngew ba ka ladei ka khep kaba donkam kyrkieh ngi hap ban pynkut noh wat ïa kane ka jingpynbeit rynrih (ïa ki Constituency) shwa ba pynlong ïa ka elekshon ba thymmai. Mynta ka Sorkar kan hap ban kren shai halor kata, kaei ka kam bakyrkieh,” u la ong shuh shuh.
