Shillong, Nailar 23 : U Nongïalam ka Liang Pyrshah u Dr Mukul Sangma ula ong ba ka sorkar ka dei ban ïaid ryngkat ryngkat bad ka rai u paidbah halor ka kam tih uranium bad ka dei ruh ban ïai bteng lynter ban leh kumta.
U la ong kino kino ki jingthaw aiñ ne pynkylla ïa ki aiñ la wanrah da ka sorkar pdeng hadien ka jingmynjur jongki ïing Dorbar Thawaiñ Parliament jongka ri.
Da ka jingstad jong ki ïing Dorbar Parliament ïa ki kyndon aiñ la pynkylla kata ka dei kawei ka bynta tangba ha kaba ïadei pat bad kata ka jingpyntreikam ha Meghalaya , la ïohi naduh mynshwa haduh mynta ba ka sorkar ka ïai iakren bad ka sorkar India halor ka jingsngew pyrshah ki paidbah ïa kane ka kam.
Haba pynkynmaw ïa ka jingïeng pyrshah jur ki paidbah halor ka jingthmu tih Uranium u la ong “ Hooid ka sorkar India ka kwah da shisha ban tih ïa u uranium na ka jylla hynrei ki paidbah bad ki seng bhalang bapher bapher ki ïeng pyrshah jur halor kane ka jingthmu bad haduh mynta ruh ka dang ïai bteng ban long beit kumjuh.
U la ong ha ka por ba u long kum u Myntri Rangbah ula ju pynsngew sha ka sorkar pdeng ïa kaei ka jingsngew ki paidbah.
“ Ngi ïai ïathuh ba ha Meghalaya hi ka sur u paidbah ka long ban pyrshah ïa ka jingtih ïa u uranium. Ngi la ïohi ïa kane bad ngi burom ïa kata kumta kam dei kaei kaei kaba ym sngew tynnad ha ka por jongnga” ong u Dr Mukul.
U la ong ka nongrim jong ka sorkar ka dei ban long ryngkat ryngkat bad ka jingsngew jong ki paidbah.
“ Ki sorkar ki lah ban kylla bad kata ka mut haba kylla ka sorkar ka dei tang ka jingïapher ki briew kiba shong ha ka shuki bad synshar ka jingshisha hi ka long ba ka sorkar kam ju kylla lano lano ruh. Kumta ka nongrim jongka sorkar ka dei ban long beit kumjuh naduh ba sdang haduh mynta ban ïaid beit bad ka mon u paidbah” ong biang u Dr Mukul.
Haba phai sha ka liang ka bording u la ong ba ka pyrthei hi shityllup ka mad ïa ki jingeh ha ka liang ka bording. “ Kumta ka don ka daw ïa ka sorkar jylla bad ïa ka sorkar pdeng ban phai kumno ban pynkhlaiñ ka jingpynmih bording. Ki kor ki bor kiba thymmai ki la mih mynta bad ki don bun ki lad ki lytni kumno ban pynbiang bording. Ka sorkar kam donkam ban shaniah ha u uranium namar ki don bun ki lad ki lynti kumno ban pynkhlaiñ ïa ka jingpynmih bording. Kumta u la ong ka jingwanrah jingpynkylla ïa ka MMDR Act da ka Parliament ka dawa ba donkam ban peit bad bishar na baroh ki liang ban ïai bteng kane ka jingburom bad jingïaid ryngkat ryngkat bad ka mon u paidbah, pynkut u Dr Mukul.
