Ka Sorkar ka angnud ban pynbeit noh kloi ïa ka jingïakren pynbeit pud bad ka Assam: Conrad

Shillong, Nailar 26: U Myntri Rangbah ka jylla u Conrad K Sangma u la ong ba ka sorkar jong u ka angnud ban shim ki rai ban pynbeit noh kloi ka jingïakren pynbeit pud hapdeng ka Meghalaya bad Assam bad ba kan neh ruh ka shongsuk shongshngaiñ ha kine ki ar jylla.
Haba kren sha ki lad pathai khubor ha ka sngi baar, u Sangma u la ong ba ka la don ka jingkynjah ha ka jingïakren pynbeit pud ka Meghalaya bad Assam mynta la kumba 46 snem.
“Haba khatduh ka sorkar MDA ka la sdang ïa kine ki jingïakren. Nga tharai ba phi dei ban ai bun ka jingïaroh ïa ngi. Kam long kaba suk, hynrei ka long kaba kyllaiñ. Kumta kaei kaba la long kynjah bad thylli kaba la don la kumba 46 snem, ngi la pyrshang ban pynbha ïa ka bad ngin bteng ban ïaitrei halor kane,” u la ong.
“Ha ka sien kaba nyngkong ba ka la don ka sorkar ban trei na ka bynta kane da kaba hok bad kaba shida. Kam pat ju jia ha ki por ba mynshwa. Hato ngi lah ban shim ki rai halor baroh, kam lah ban long. Kam long ruh kaba suk hynrei ngi la ïai pyrshang. Haoid ngi la leh bad ngin ai ïa kaba bha tam namar ngi kwah ban don ka jingshongsuk kaba neh junom,” bynrap u Myntri Rangbah.
Haba phai sha ka jingjia ba dangshen ha Maikhuli ha Ri Bhoi district, u Sangma u la ong ba watla ka la don ka jingsngewkhia bad ki jingjia, ka jinglong jingman mynta ka la long kaba jai jai.
U Sangma u la ong ba ka kam pud kam sam ka dei kaba kyllaiñ bad kaba don ka jingsngew, bad da ka khana kaba la ïaid mynta la palat 52 snem, bad kumta ban ïoh ïa ka rai kaba khatduh donkam ïa ka por bad ka jingpyrshang.
U Myntri Rangbah u la kdew ba ka don ka jingïasngewthuh hapdeng ki bor pynïaid jong baroh artylli ki jylla bad ki paidbah ba bun kiba la ïarap ban pynbeit ïa katto katne ki kam.
“Ha kajuh ka por ngi kwah ban ïohi ba ki briew kiba shong ha kine ki thaiñ kin im ha ka suk ka saiñ. Ki ïai don barabor ki jingïaleh, hynrei kum kane ka jingeh na ka liang jong ngi, ngin ïaid ha ka lynti kaba dei bad ngin ïapeit kumno ki kam kin plie ha ki por ban wan,” u la bynrap.