Ka sngi kyrpang u ‘Sngap Sing Syiem’, dei ka sngi jong ka jingrai kut bad bud ïa ki nuksa ba bha: Renik

Mawkyrwat, ‘Naiwieng 30: Kum ka dak jong ka jingkynmaw burom ïa ka lyngkhuh sngi ba 174 jong u Sngap Sing Syiem uwei na ki Syiem ba khraw jong ka Hima Maharam, mynta ka sngi ka Hynñiewtrep Youth’s Council (HYC) ha ryngkat kiba ha ïing ha sem jong u Sngap Sing Syiem ki la ïoh ban rakhe kynmaw burom ïa kane ka sngi kyrpang ha kaba ïa ka jingïalang la pynlong hapoh ka Hall ka Nativity Higher Secondary School, Mawkyrwat.
Lah ban pynkynmaw ba la rakhe kane ka sngi 30 tarik jong u bnai ‘Naiwieng manla u snem kum ka sngi ba kyrpang jong u Sngap Sing Syiem ymdei ka sngi ïap ne ka sngi kha hynrei ka dei kawei na ki bynta ba une u syiem ula pynmih ïa kawei ka kot ne ka dulir kaba long kumno ban pyneh pynsah ïa ka khyndew ka shyiap bad ka riti ka dustur jong ka Hima ha ki snem kiba leit noh, ïa kane la lamkhmat ha ka jingkren lamphrang jong u bah Tolintine Wahlang, Secretary jong ka Dorbar Hima.
U bah Renikton Lyngdoh Tongkhar u Nongmihkhmat jong ka Mawkyrwat Constituency bad kum u Myntri jong ka Sorkar Meghalaya haba kren kum u kongsan ha ka jingïalang u la pynpaw ka jingsngewkmen ban ïoh ban ïa don bynta lang bad ki samla ha kum kane ka sngi ba kyrpang ka Sngap Syiem Day, ym kum u Myntri Sorkar hynrei kum u nongmihkhmat jong ka dong ka thaiñ ban kynmaw ïa ki kam ba bha jong u Syiem bakhraw u Sngap Sing Syiem. U la ong ruh ba ka long kaba dei haduh katta katta ban kynmaw burom ïa ki ‘riew khraw jong ka dong ka thaiñ kiba la leh bha ha ka ri bad jaidbynriew kiba la leit noh noh kane ka pyrthei khamtam eh lada long kaba lah lei lei ba ki longdien kin bud ïa ki nuksa ba bha jong ki longshwa ïa kaba ki ki la pyni.
Haba kren shaphang u Sngap Sing Syiem, u bah Renikton u la ong ba kum u briew u don shibun ki jingduna namar ha ka jingim briew ym don uba biang pynban kum ki nongpeit ki dei ban peit bad ïohi ïa ki jingbha ym ban ïohi ïa ki jingduna, namar dei ha une keiñ ba kum ka jaidbynriew ka ïohi bad ka sakhi ïa ka jingshlur jong u kum u syiem bad ïa kata ka jinglah jong u ngi kynmaw burom ha kane ka sngi ba dei u Syiem uba la ïeng na ka bynta ka hima, ka ri bad ka jaidbynriew bad ban ïaleh pyrshah ïa ki briew kiba nabar.
U la ong ruh ba kane ka sngi kam dei ka sngi jong ka jingkynmaw burom tang ïa u Sngap Sing Syiem bad ki kam jong u hynrei ka phalang ruh ba kin kynmaw burom de ïa kiwei pat ki ‘riew rangbah jong ka dong ka thaiñ kum u bah Rowell Lyngdoh (bam kwai ha dwar U Blei) u MLA barim uba la shim bad ïalam ïa ka dong ka thaiñ ha ki 30 snem kiba la leit noh hapoh jong ka Mawkyrwat Constituency bad kumjuh ruh u bah B.B. Nongsiej (bam kwai ha dwar U Blei) u MLA barim uba la shim ïa ka lyngkor kumba 15 snem ei ei bad ïa kiwei de ki ‘riew paw khmat.
Namarkata, lyngba kane ka jingïalang u bah Renik u la buh ka jingkyrpad ïa ki samla jong ka dong ka thaiñ ba haba ki shim ban ïalam ïa ka ri bad ka jaidbyniew ki dei ban shim da kata ka mynsiem jong ka jingkitkhlieh haba ki leh ïa kano kano ka kam kiba bha.
Ha ka juh ka por u la ong ruh ba ban kynmaw ïa kane ka sngi ka long ruh kum ka dak ban phai dien ruh ïa ka jingshlur jong ki, ba ki don shisha ïa ka mynsiem ba shynrang ha kaba kum ka jaidbynriew kan nang ïaid shakhmat bad ban nang kiew bad ban nym long kiba sahdien ha ki bynta baroh la ka long ha ka pule ka puthi, ha ka ïoh ka kot bad ha ki bynta baroh. Namarkata, u la pynpaw ruh ka jingkitbok kitrwiang na ka bynta ka HYC, ïa ki samla jong ka ri bad ka jaidbynriew ha kaba kin long ka jaidbynriew kaba tip-briew tip-blei.
Ha kajuh hi ka sngi kum ka dak jong ka jingaimynsiem ïa ki samla kiba don sap ha ki bynta bapher bapher jong ki jingïalehkai, ka Hynñiewtrep Youths Council (HYC) ka la pynkupburom da ki khunsam ryngkat ki syrnod.
Kiwei pat ki nongkren ki long u bah Tolintine Wahlang, Secretary jong ka Dorbar Hima, u bah Arbok Kharjahrin, President ka HYC South West Khasi Hills District, u bah Kitborlang Nongrem, Myntri Shnong Rangthong.
La pynrhem ïa kane ka sngi da ka jingrwai kyrpang na u bah Commander Lyngkhoi bad ka jingshad na u samla Rikupar Syiemlieh.
Mawkyrwat: Ha kajuh hi ka sngi ka KSU Mawkyrwat Circle ka la rakhe ïa ka lyngkhuh snem ba 174 jong u Sngap Sing Syiem u syiem bakhraw ka Hima Maharam da ka jingïaid kjat ka ba sdang naduh ka Shnong Nonglang shaduh Mawtngam, South West Khasi Hills District ka Shnong ba la kha ïa U Sngap Sing Syiem.
Ha kane ka sngi la ïalam ïa ka kynhun da u Poldip Tongwah, President ka KSU Mawkyrwat Circle, bad la ïa shimbynta da ki para nongïalam na ka KSU Mawkyrwat Circle, ki dkhot na ki Unit, ki Samla kynthei bad ki Longkmie.
La pynlong ïa ka jingïalang ba lyngkot bad ka jingbuh syntiew ha u Mot jong u Sngap Sing Syiem ba la tei da ka KSU Mawkyrwat Circle ha ka Shnong Mawtngan ha ka jingïadonlang u Myntri ka Shnong Mawtngan.