Ka shi vote ka kham khlaiñ ban ïa ki jingïakhih ba ngi mih sha surok: Meshuwa K Mawthoh

Shillong, K’lyngkot 24: U Project Director jong ka Meghalaya Model United Nations (MMUN) u Samla Meshuwa Kupar Mawthoh u la ong ba ka dor jong ka shi vote kaba ngi thep ha ka elekshon ka kham khalaiñ bad kham heh sur ba ïa ki jingïakhih kiba ha surok ban dawa ïa ka hok jong ngi.
Haba kren bad ki nongthoh khubor ha ka jingpynlong ïa ka Tamasa ka Synshar Paidbah ba la pynlong da ka ophis u Chief Election Officers (CEO) jong ka jylla ha ryngkat ka jingïatreilang bad ka MMUN, u la ong ba ka jingpynlong ka ophis u CEO ïa kane ka tamsa ka long ban khring ïa ki samla bad ki nongshong shong ka jylla ba kin wan sha khmat ban thep ïa ka vote namar ym ba ka dei tang ka hok ki nongshong shnong hynrei ka dei ruh ka kamram ba kyntang ba hap ban pyndep hok.
“Ka jingmih jong ngi sha surok ban ïa pyrta ïa kiba bun ki mat jingdawa na ka sorkar ki dei ki rukom ïa khih ha ka synshar paidbah hynrei nga kwah ban pynkynmaw hangne ba ka jingthep ïa ka shi vote ka kham khlaiñ bor ban ïa kino kino ki rukom ïakhih namar dei da ka vote ba ngi thep ka rai mano ban long ki nongsynshar jong ngi bad nga kwah ba ki paidbah kin sngewthuh ïa kane ka iktiar jong ki,” u la ong.
Shuh shuh u la ong ba ka shi vote ba ngi ñion ha u budam ka Electronic Voting Machine (EVM) ym tang ba ka rai ïa ka san snem jong ka jylla hynrei ïa ka lawei ba sha jngai bah.
“Samla ka jylla bad ki nongshnong shnong baroh mih paidbah ban pyndep la ka kamram jong phi ha ka 27 tarik Rymphang namar phi dei ki nongjied nongsynshar bad ka jingjied kam dei ban jied tang dep rukom ne pynshong nia ha ka pisa hynrei pyndonkam ïa ka jingstad bad wat die ïa ka vote bad ka long rynïeng jong phi,” u la kyntu.
Ha kane ka sngi na ka liang ka MMUN ka la pynlong ruh ïa ki jingïakhob kiba pher bapher ba kynthup naduh ka jingïatyrko nia, ka ïakob dro bad thoh ese bad ka jingïkyntip ruh.