Nongpoh, Ïaiong 05: Ban dang ïai bteng ban pynneh pynsah ïa ki riti ki dustur bad ka jingleh niam tynrai ka Raid Nonglyngdoh ba hap ha ka Nongpoh Sirdarship, ka Raid Nonglyngdoh ka san pynlong biang ïa ka Shad Sajer hapoh ka khlaw kyntang kaba don ha Mawjong bad kane ka shad Sajer ka dei ruh ha ka sien kaba 17 naduh ba la pynim biang ïa kane ka shad tynrai ka raid Nongyngdoh.
U Lyngdoh ka Raid Nonglyngdoh, u Sensy Lyngdoh bad u Pator ka Kur Nongshli, u Bah Liander Nongshli, ki la pyntip paidbah ba kane ka shad sajer kan long ha ka 12 tarik u Ïaiong 2025 ha kaba yn wan sakhi da ki heh ki hain sorkar bad ruh ki riew pawkhmat na kyleng, kaba long kum ka jingai mynsiem ban ka Raid kan dang lah ban pynneh pynsah ïa kane ka Shad Sajer kaba dei kawei na ka shad tynrai hapoh ka Raid.
Kine ki nongïalam Raid ki la pynpaw ruh ba ha katei ka sngi ki don shibun ki jingleh niam bad ki jingshad tynrai, naduh ka rwai ka siaw bad ka put ka tem kumba la ïalam ki longshuwa ki manshuwa bad ka Raid ka khot ka wer ïa ki khun ki hajar, bad ki paidbah ka Ri Bhoi bad na ka jylla hi baroh kawei ban wan ban sakhi shi bynta ban dang lah ban ïai bteng ha kaba pynneh pynsah ïa kane ka lehniam shad Sajer ka Raid Nonglyngdoh.
