Ka seng TMC kam don jingmut shuh ha ka jylli saiñ pyrthei ka Meghalaya, ong ka Congress

Shillong, Nohprah 23: Ha ka jylli jong ka saiñ pyrthei u President ka Meghalaya Pradesh Congress Committee (MPCC) bad MP barim ka Shillong Bah Vincent H Pala ula kynnoh ba u Myntri Rangbah barim Dr Mukul Sangma bad ka party jong u-ka All India Trinamool Congress (AITC) kila kylla long “ki bym don jingmut shuh” ha ka jylli saiñ pyrthei hapoh Ri-lum Khasi bad Jaiñtia.
Ha kaba ïadei bad kane na ka liang u nongïalam ka seng Congress u la ong ba ka Congress kam don jingkhuslai satia bad ieh ha u Dr Mukul la u kwah ban wanphai biang sha ka Congress ne rai da kumwei.
Kane ka nongrim u Bah Pala ka la mih kum ka jingkynthoh ïa ka jingkynnoh ba dang shen jong u Dr Mukul ba ka jingkylli kam mih satia ïa u ban leit phai biang sha ka Congress namar ka la ïatreilang bad ka Sorkar Meghalaya Democratic Alliance (MDA) kaba kyrshan da ka Bharatiya Janata Party (BJP).
Shuh shuh na ka liang jong u, u la ong, “Ngim don jingkhuslai satia la u Dr Mukul un wanphai biang ne em. Ngim don eiei satia bad ka shong ha u ban shim rai,” ula bynrap.
Na ka liang jong u u la ong ba ka Congress ka la jop ïa ka Tura Parliamentary seat ha Ri-lum Garo khlem u Dr Mukul Sangma, une u MP barim ka Shillong ula ong, “Kyrmen skhem ba ha Ri-lum Khasi bad Jaiñtia ruh ha kane ka kynti, ngi dei ban leh bha khlem u Dr Mukul. Ngin kyrshan ba hadien habud ruh ngin sa nang lah ban leh kham bha”.
Ha kaba ïadei bad kane haba kynnoh ba u Dr Mukul bad ka TMC kila kylla long ki bym don jingmut shuh ha Ri-lum Khasi bad Jaiñtia, u Bah Pala ula ong, “U Dr Mukul um shym la don satia ïa ki kyrtong ban ïakhun ïa ka elekshon MDC. Kane ka pyni ba ka TMC ka la kut ha ka jylli saiñ pyrthei ha Ri-lum Khasi bad Jaiñtia bad ki briew jong ka, ki la wan ïasoh lut sha ka Congress. Kane ka mut ba u Dr Mukul ula kut ha Ri-lum Khasi bad Jaiñtia”.