Ka seng kan ym shah da leilei ruh ban pynkynriah jubor ïa ki nongdie madan na Khyndai Lad: MGSPHSVA

Shillong, Jylliew, 29: Ka seng ki nongdie madan ka Meghalaya and Greater Shillong Progressive Hawkers and Street Vendors Association (MGSPHSVA) ha ka sngi U Blei ka la pyntip ba kan ym shah da lei lei ruh ban weng ne pynkynriah jubor ïa ki nongdie madan na Khyndai Lad, Shillong bad dawa ïa ka Municipal bad ïa ka tnat Pynroi Sor ba ki dei ban pynbeit shwa ïa ki kynrum kynram bad ban pyndam shwa ïa ki laisen kiba la ai sha ki briew ki bym dei ki nongdie madan.

“Ka seng kan ym shah da lei lei ruh ban weng ne pynkynriah jubor ïa ki nongdie madan na Khyndai Lad. Hynrei ka Municipal bad tnat Urban ki dei ban pynbeit shuwa ïa ki kynrum kynram bad ka dei ban pyndam shuwa ïa ki Licence kiba ki la ai sha ki briew ki bym dei ki nongdie madan,” ong u kyrwoh ba la phah da u General Secretary ka MGSPHSVA u Bah Shane Thabah.

“Ka seng ka dawa ba dei ban don ka jingïapyrkhat bad jingïashim bynta lang da baroh ha kaba thaw (shna) ïa ki jaka die jingdie jong ki nongdie madan bad ka long ruh kaba kongsan ban shim nongmuna na kiwei ki sorbah kum na Delhi, Sikkim, Bangalore bad kiwei de ki jaka khnang ban lah ban shna ïa ki jaka die jingdie kiba khuid, kiba kylluid, kiba itynnat bad kiba ïaid ïew. Kane ka jingpyrkhat lang kan wanrah ruh ka jingmyntoi bad jingbha ym tang ïa ki nongdie madan, hynrei ïa baroh ki nongshong shnong,” la ong u kyrwoh.

Ka Seng ka la pynpaw ruh ïa ka jingpyrshah kaba jur halor ka jingleh donbor bad ka jingshim rai marwei ka Municipal bad tnat Urban ha kaba thaw ïa ki jaka shong jong ki nongdie madan ha ka bynta ba shapoh jong ka MUDA parking lot bad ha pyrshah ka SBI, khlem da wanrah ha ka meeting jong ka PTVC bad khlem ka jingïamynjur lang jong ki dkhot jong ka PTVC. Kane ka jingrai marwei jong ka Municipal bad tnat Urban ka long ka jingleh be-aiñ.

Ka MGSPHSVA kam don kano kano ka jingthmu ban pynthut ne pynwit ïa ka jingpyntreikam ïa ka Aiñ. Hynrei ka angnud hir hir ba ka Aiñ kan treikam bad ba yn lah ban pynbeit ïa ka kam jong ki nongdie madan kaba la sah teng mynta la jan shi phew snem. Kumba ka ju long, ka Seng ka kloi ban ïatreilang bad ka Sorkar, hynrei ka dawa ruh ba ka Sorkar lyngba ka Municipal bad Urban Department ba kin pynbeit shuwa ïa ki kynrum kynram bad ki jingkynriang ha ka rukom pyntreikam ïa ka Aiñ kumba ka paw ha ki rai ba marwei shimet jong ka Municipal bad tnat Urban. Ka Seng kan ym pdiang ïa kine ki kam be-aiñ kiba buh jingeh ïa ki nongdie madan bad kan ym shah ba ki bor Sorkar kin khñoit beiñ ïa ki nongdie madan bad ïuhroit ïa ki hok jong ki. Ka Seng kan ym shah ruh ba ki bor Sorkar kin pyndonkam bakla ïa ka Aiñ la pyntip u kyrwoh na u General Secretary.

Ka MGSPHSVA lyngba kane ka kyrwoh ka pynkynmaw ruh ïa ka PTVC, ka Municipal bad tnat Urban ba ka Seng ka la phah ïa ki shithi bad ki jingai jingmut halor kumno ban pyndonkam bad pynitynnat ïa ki jaka shong die jingdie jong ki nongdie madan. Ka MGSPHSVA ka la pynkhreh ruh ban buh hakhmat ka PTVC ïa ka dur ka dar jong ki jaka shong die jingdie kiba khuid, kiba kylluid bad kiba itynnat. Ka seng ka la mynjur ruh ban kynriah sha ki jaka kiba biang bad ïa kane yn lah ban leh hadien ka jingïakren, ka jingïapynbeit bad jingïaralang ha ka PTVC. Ha kajuh ka por pat ka Sorkar lyngba ka tnat Municipal bad tnat Urban ki dei ban pynbeit shuwa ïa ki jingduna bad ki kynrum kynram kumba ka Seng ka la kdew ha ki shithi bad jingujor jong ka.

“Ka Seng ka khot ïa ki nongshong shnong, ki nongput nongtem, ki architect, ki barikor, ki nongdro bad kiwei ban ïa ai jingmut lem,” ong u Bah Thabah.

U la pyntip ba ka jingïashim bynta jong ka seng ha ka Provisional Town Vending Committee bad ha ka in situ survey ka long ban ïatreilang bad ban ujor pyrshah ïa ki bym dei hok ki nongdie madan kiba ïoh ïa ka Vending Licence bad ka seng ka la ieng ban dawa ryngkat bad ki nongdie madan kiba shisha kiba khlem ïoh ïa ka Licence.

“Ka jingïashim bynta jong ka Seng MGSPHSVA ha ka Provisional Town Vending Committee ka long kaba shai kdar ba kane ka jingpynbeit kam pat dei kaba kut, hynrei ka dei tang ka jingpynkhreh lypa haduh kata ka sngi ba ka Sorkar kan thaw ïa ka Town Vending Committee kaba pura ka ban sa trei ïa ka kam ban jurip bniah ïa ki iew tynrai, ki iew long hi, nangta kan kheiñ jingkheiñ katno ngut ki nongdie madan kin shong die jingdie katkum ka jingdon briew bad kan kdew ïa ki jaka ba kin shong die jingdie bad kiwei kiwei de ki kam ba la pruid dak ha ka Aiñ,” u la bynrap.

“Na ka por sha ka por ka Seng ka la ju phah ïa ki jingujor ban kdew ïa ki jingduna bad jingdkoh ha ka jingtreikam jong ka Provisional Town Vending Committee (PTVC). Kum ka nuksa, ka PTVC kam shym lah ban pyntreikam ïa ka Digital Survey kaba la khmihlynti ban pyntreikam katkum ka juk stad technology khnang ban wanrah ïa ka jingkhuid bad jingsuba ha ka jingpyntreikam ïa ka Aiñ”