Shillong, Risaw 17: Ka 33rd All Faith-All Religion Sadbhavana Sammelan (Get Together of Harmony) jong ka Central Puja Committee (CPC), Meghalaya la pynlong ha Rilbong Durga Puja Mandapam ha ka 15 tarik u Risaw.Ia kane ka la pynlong ha Rilbong Durga Puja Committee (RDPC), kaba la rakhe ïa ka centenary jong ka Durga Puja mynta u snem.
Ki nongialam jong ki jingriew ngeit bad ki niam bapher bapher, ki khlieh nongsynshar kiba dei na ka SNBH, ki nongmihkhmat jong ki komiti Durga Puja bad ki nongwan jngohkai ki la wan sha katei ka jingialang kaba man la u snem, kaba la shwa ka aiom lehkmen.
Ïa kane ka jingduwai jong baroh ki jingngeit, kaba dei ka bynta ba kongsan jong kane ka prokram, la pule da ki nongïalam niam ba la ïalam da u Swami Hitakamananda, Secretary ka Ramakrishna Mission, Shillong.
U president ka RDPC u Padma Shri u Manas Chaudhuri u la pynkynmaw ïa ka jingdonkam jong ka jingïalang ïatylli, da kaba pynpaw ba ka jingïalang kaba nyngkong eh jong ka la long ha Rilbong ha u snem 1913.U la ong ba ka jingïakren ba nyngkong eh ka la long ha madan jong kane ka jaka, ha kaba ki nongïashim bynta ki shong kyllum khlem ka stage, ka podium ne kiwei kiwei ki jingpynbeit ryntih.
U la ban jur ba ka jingmih na ka jingthmu ka kham kongsan ban ïa ki jingpynbeit, namar ka la buh ïa ka nongrim ba ka jingïalang kan nangroi bad nangroi katba nangmih ki snem.
U kongsan uba dei ruh u Symbud Myntri Rangbah ka Jylla Meghalaya u Bah Sniawbhalang Dhar u la ïaroh ïa kane ka sienjam jong ka Central Puja Committee bad u la kam ba um shym la tip satia ïa kum kane ka jingïalang ba la pynlong ha kane ka jylla.U la ong ba wat la u dei na ka jingngeit Niamtre hynrei u la pynroi ia ka jingmut jong ka jingiatylli ha ka niam naduh dang rit bad u la iai bteng ban leh ïa ka da ka jingngeit skhem kaba pura.
U Symbud kongsan u Bah Sanbor Shullai u la pynkynmaw ïa ka jingïadei kaba la slem bha bad ka Central Puja Committee bad pynpaw ruh ïa ka jingai mynsiem bad jingkyrshan naduh ka dohnud ïa ka thong jong ka ban kyntiew ïa ka jingïatylli.
U President ka CPC Meghalaya u Naba Bhattacharjee u la ong ba ka niam bad ka jingngeit ki dei ki jingsngew kiba la bat jylliew bad kiba don burom, hynrei ym don kawei ka niam kaba mihkhmat ia baroh ki jaitbynriew.U la khot ia ka jingpeit bniah ia lade halor ka jingdonkam ban buh hakhmat eh ia ka jingiatylli hapdeng ka longbriew manbriew ryngkat bad ka jingiatylli ha ka niam, katba dang pynneh ia ka jingburom ia ki jingngeit jong uwei pa uwei.
Ïa ka CPC’s Sarad Sanman na ka bynta u snem 2025-26 la sam da u kongsan sha ki hynriew ngut ki nongïoh khusnam: u Prabhat Kanti Paul, u Ramshevak Singh, u Lur Mangkara Bashai Rani, u P.D. Chokhani, u Salil Gewali wa u S.L. Singhania.
Kawei kaba kongsan ha kane ka jingïalang mynta u snem ka long ka jingïashim bynta jong ki arngut ki khynnah skul kata u Jason Suchiang bad ka Shina Haokip jong ka B.K. Bajoria School, kiba la ïasam ïa ki jingsngew bad ki jingpyrkhat jong ki halor ka jingïalang jong ka jingïatylli.
Haba ai khublei ïa ka jingpyrshang jong ka CPC, baroh arngut ki samla pule ki la pynpaw ïa ka jingdonkam ban pynïasoh ïa ki samla ha ki jingïakren hapdeng ki niam.Ki la ban jur ia ka jingdonkam ban pyniar ia ka jingktah jong kum kine ki jingialang, ban ai lad ia ki samla ban iashim bynta, bad ban sngap ia ki jingai jingmut jong ki ha ka lynti ban iaid shakhmat na ka bynta ban kyntiew ia ka jingiatylli hapdeng ki samla.
