Ka pyni shai, ba ki bym don Aadhaar, ki la dei ki koidi kiba ngat ban shong ha ka phatok, kaba khlem jingker

K a hukum jong ka Meghalaya High Court, kaba dang shu mih ha ki khyndiat sngi ba ladep, ka la khalah shisyndon ïa ka jyrwit kaba la pynsoh kyrdot da ka sorkar jylla, ha kaba ïadei bad ka lad ka kabu jong u duk u rangli, ha ki jingdonkam, kiba man la ka sngi kiba ïadei bad ka sorkar bad kata ka long, ba ka High Court, ka la pynmih ïa ka hukum, ba um dei tang u Aadhaar, uba lah ban pynsakhi bad pynsabut ïa ka jinglong trai shnong, hynrei ki dei ban kynthup ïa ka dur thep vote, ka EPIC, ka pan card kaba dei kaba la ithuh ha ki Bank, ka passport bad kiwei de ki dulir.
Kaba sngewlehraiñ hi khait, haba da ki nongmihkhmat bad ki myntri jong ka sorkar jylla, kiba kynthup ïa u Myntri Rangbah, ïa ki symbud Myntri Rangbah jong u bad u Myntri sambam, ba ki nud ban kren ñiewbeiñ ïa ki paidbah, da kaba ki ong, ba ki bym don Aadhaar, kin duh khaw rashon lane ba kin hap ban ïap tyrsaw noh, ba kin nym ïoh shuh ïa ki skhim pynroi jong ka sorkar India ne ka sorkar jylla bad ka dei ruh lyngba kane ka aiñ, ba la teh kyndon ïa ki samla pule ban ïoh baibam, ba la teh kyndon, ba kin ïoh rung sha ki jaka pule bad kumjuh ïa baroh jait ki jingïadei kam bad ka sorkar jylla ne ka sorkar India bad katei ka pyni shai, ba ki bym don Aadhaar, ki la dei ki koidi kiba ngat ban shong ha ka phatok, kaba khlem jingker namar ka apot sepsngi jong ki, ka la ïaryngkat bad ki poiwir na Bangladesh ne na kiwei pat ki ri, namarba lada ki ïap thngan ruh kam lei lei, tang namar ba kim don ïa utei u Aadhaar number.
Kawei kaba ngi dei ban sngewthuh shai bha, ka long ba ka India, ka dei ka ri synshar paidbah bad ka mon jong u paidlang bad nongshong shnong ka ri, ka shong hi ha u ne ka bad kata ka long, ba ki don kiba kwah ban shondur EPIC, tangba kim ju leit thep vote, nangta don kiba don job card ban trei bylla sngi, don pat ki bym kwah ban shon Aadhaar bad ki don la ki jong ki jong ki jingsngewthuh jong ki, hynrei ban shu khanglut hi khait ïa ki jingïarap jong ka sorkar, kumta ka pyni, ba ki bym don Aadhaar, ki dei ki poiwir, ki dei kiba la shah kheiñ ïap ha ka sorkar bad katei kam dei ka dak kaba bha ha ka synshar paidbah lane ha ka imlang sahlang.
Kumba ka long lei mynta, ka pyni shai ba wat u Aadhaar ruh, um dei u number uba lah ban shaniah, namar ba ka elekshon commision, wat tang ban pynthymmai ïa ki kyrteng thep vote, kam shaniah satia ïa ka Aadhaar card bad la lap ha kiba bun ki jylla, ba uwei u briew, u dang bat kai ïa ar, lai tylli u Aadhaar card.
Ka sorkar India kam lah ban tehlakam ïa ka jingkheiñ briew jong ka, lyngba ka khana samari lane lyngba ki jingkheiñ bapher jong ka, hynrei ka donkam ban bthah ïa ki shnong, ïa ki sengkur ba kin don la ka jong ka khanasamari bad katei kan dei tang kawei ka lynti ban ïoh ïa ka jingkheiñ kaba biang bad kaba pura, halor ka jingdon briew, ha kano kano ka shnong lane ha ka jylla bad ha ka ri hi baroh kawei.
Ka rai jong ka high court, ka la biang ban pynshisha, ba ki nongmihkhmat paidbah, lada dei ki MLA, ki MP ne ki MDC, ki dei kiba shu heh tang ka tyngam, hynrei ha kaba ïadei bad ïakhun ha ka khia ka shon bad ka ïap ka im, ka shong pleng ha u riew paidbah ba un hap ban ïada dalade hi lane ba un ïap marwei haba u ïatyngkhuh ha ka saw ka sian.
Nalor ka jingeh ki samla pule haba ïadei bad ka jingdonkam ban ai ïa u Aadhaar card ban ïoh scholarship ne baibam, mynta kiba shim khaw rashon ruh ki mad shuh ki jingeh namar la sngewthuh ba lada kim aiti ïa une u Aadhaar card kin duh lut ïa ki jingmyntoi ne ki skhim na ka sorkar Pdeng bad sorkar jylla.
La ïohi ruh ba ki la don ruh da ki hajar ngut ki longïing kiba la hap pynphai noh ïa la ki jong ki Rashon Card tang na ka daw ba kim shym pat la pynïasoh ïa la ka jong ka Rashon Card bad ka Aadhaar card jong ki, kumba la bthah da ka sorkar Pdeng ne ki sorkar jylla jong ki.
Halor kane ka kam, watla ka Supreme court ne ka Ïingkashari ba halor duh jong ka ri ka la dep kren shai bad pynpaw ruh ba ym lah ban pynbor ïa ki nongshong shnong jong ka ri ban leit shondur Aadhaar card kumba la bthah da ka sorkar Pdeng, hynrei kumba la ïohi bad paw pyrthei ka sorkar Pdeng ne ki Sorkar jylla kim patiaw ne ha kiba bun ki khep kim kheiñ snep shuh wat ïa ki hukum jong ka Ïingkashari ba halor duh jong ka Ri India ne wat ki High Court ne Ïingkashari ba halor ha la ki jong ki jong ki jylla ka Ri India.