Jowai, Risaw 06 : u MLA ka 7-Amlarem Constituency uba ba dei ruh u Minister I/c Education,Border Area Development bad ka tnad kam pohïing u ma Lahkmen Rymbui ha ka jingkren ha ka jingïalang pynkup burom ïaki samla pule ha 7-Amlarem ula ong “lada phim don ha ka bor phin ym lah ban leh eiei namar kata ka politic bad ka roi ka par kidei ban ïaidlang kumjuh”.
Ha kaba ïadei bad kane ka Election 2023 ka ban sa wan u ma Rymbui ula pynsngew da kaba ong “to ngin ïa peit katno ngut shashi kiba ieit ïa ka roi ka par bad katno ngut kiba isih ïa ka bad kiba ieit tang ka syntur”, lada don ki nongïalam shnong kiba ym kwah ban nym don ka skul bad kumjuh ïa ki surok wat hadien ba la dep pynpoi sha ki shnong, ngin sa ïapeit keiñ, la ong u ma Lahkmen Rymbui.
Da kaba u ai nuksa kumba long mynta kila don haduh 20 tylli ki skul hapoh ri Khasi ki ban sa ïoh ïa ki Building ba thymmai napdeng kine 10 tylli kiba dep ïoh thymmai, hato kine ki dei tang kiba shu urlong mo lada khlem ka jingtrei shitom? La buh jingkylli u ma Rymbui, shuh shuh u la pyntip ruh shaphang ka project jong ka surok sha Muktapur bad ka surok sha Kudeng Thymmai bad ula ong baroh kine ki kam pynroi ki dei ka jingtrei shitom jong ka sorkar.
Ula pynsngew ruh hapoh kine ki san tylli ki snem kiba la leit haduh 39 ngut ki samla pule jong katei ka thaiñ kiba kum MLA ula siew ei ïa ka bai skul jong ki ba kin bteng ïa ka jingpule ha ka Graduation Course bad lada don kino kino ki samla pule kiba dang donkam jingïarap ha ka pule puthi wat na ka liang jong u u kloi ban plie ïa ka jingkhang na ka bynta ban ai jingïarap ïa ki.
Da kaba u pynkut ka jingkren u ong lada ka Amlarem kan roi ka Ri-Lum Jaiñtia ruh kan roi kan par bad kumjuh ïa ka jylla hi baroh kawei namar kata kum u briew u dei ban im hapoh ka imlang ka sahlang bad ban don ka jingïatreilang da kaba kyntu lang ruh ïa ki samla pule kiba ïoh ïa kane ka khusnam ba kin don ka jingïatreilang ha ka jingim.
