Shillong, Nailur 17: U Myntri Khynnah jong ka Sorkar Pdeng ba khmih ïa ki tnad Jal Shakti, Food Processing bad Industries, u Prahlad Singh Patel mynta ka Sngi u Blei, ula ong ba ka skhim ‘PM Vishwakarma’ ka long ka jingai burom ïa ki nongshna tiar tynrai.
U Patel ula ong, ïa kane ha ka jingai jingkren jong u ha nongbah Shillong ha ka jingplie paidbah ïa katei ka skhim da u Myntri Rangbahduh ka ri u Narendra Modi.
‘Ka PM Vishwakarma ka dei ka jingai burom ïa ki Nongshna tiar tynrai” ong u Prahlad Singh. Ula ban jur ba ki nongshna tiar tynrai ki don ka bynta kaba khraw ha ka imlang sahlang da kaba pynneh ïa ka deiriti bad ki rukom shna tiar ba hyndai jong ka India hynrei kim pat ïoh ka jingithuh kaba ki dei ban ïoh namar ka sap ka phong kaba ki don.
U Patel ula ong, ba dei u Myntri Rangbah duh ka ri u Narendra Modi uba la leh ïa kaba donkam na ka bynta ki nongshna tiar tynrai da kaba sdang ïa ka skhim ‘PM Vishwakarma’ bad kane ka sienjam kan ai jingkyrshan bad ai jinghikai ban pynkupbor ïa kine ki dkhot ba kongsan jong ka imlang sahlang.
U la ai khublei ïa baroh ha ka Vishwakarma Jayanti bad ula ong ba kane ka dei na ka bynta ki nongshna tiar tynrai bad ula pynpaw ka jingsngewnguh ïa u Myntri Rangbahduh uba la sdang ïa kane ka skhim na ka bynta ki nongshna tiar jong ka ri.
“Ka long kaba hap ban kdew ruh hangne bad kane ka dei ka lyngkhuh sngi kha jong u Myntri Rangbahduh jong ngi, u Narendra Modiuba uba la trei met bad mynsiem ban tei ïa ka India kaba riewspah. Kane ka dei ka sngi kaba kyrpang ha ka jingïaid lynti ka India namar ka Sorkar ka la wan shakhmat kum ka nongïatreilang ban kyntiew ïa ka burom, pynkhlaiñ ïa ka jinglah treikam bad pynkhlaiñ ïa ka jingriewspah jong ki nongshna tiar tynrai” ong u Myntri Khynnah jong ka Sorkar Pdeng.
Haba batai shaphang ka skhim, u Myntri ula ong, ba ha kine ki san snem ban wan naduh u 2023-24 haduh 2027-28 ha ka jingmang tyngka kaba T 13,000 klur, 18 tylli ki kam ba kongsan kiba ïadei bad ki nongshna tiar – misteri; nongshna lieng; nongshna tiar ïaleh thma; nongshohnar; nongshna tyrnem bad ki tiar, nongshna tala; nongshna ksiar; nongshna khiew; nongshna tiar da ki maw, nongshoh maw; nongsuhjuti; misteri maw, nongshna shang, nongthaiñ tyllai, nongshna khun bynriew bad jingialehkai, nongkhap shniuh; nongshna jingdeng da ki syntiew, nongsaitjaiñ; nongsuhjaiñ bad nongshna jar tong dohkha kin hap hapoh ka skhim PM Vishwakarma Scheme.
Ula ong ba kitei kin ïoh jingithuh lyngba ki PM Vishwakarma certificate bad ID card, ka jingpyntbit shuh shuh, ka jingmyntoi kaba T.15,000, ka jingkyrshan pisa kaba haduh T 1 lak ha ka wat banyngkong bad T. 2 lak ha ka wat baar, bad ka sut kaba duna kaba 5%, ka jingmyntoi na ki jingsiew digital bad ka jingïarap ban pynïaid ïew ïa ki tiar.
“Ka skhim ‘PM Vishwakarma’ ka dei ka dak jong ka jingïakhleh jong ki jingngeit tynrai bad ki rukom shna tiar tynrai bad ka skhim ka plié lad kamai jakpoh bad ha kajuh ka por ka pynneh ïa ka Guru-Shishya Parampara kaba hyndai jong ka India” la ong u Myntri.
Ha ka jingbatai shaphang ki sienjam ban ai jingpyntbit shuh shuh ïa ki nongshna tiar ba la tbit lypa, u Patel ula ong, ba ha ka por ai jinghikai, yn ai T.500 ha ka shi sngi ïa ki nongshna tiar bad ula ong, ruh ba yn ai jingmyntoi kaba kot haduh T. 15,000 bad ka Sorkar kan ïarap ban pyni, ban song bad ban pynïaid ïew ïa ki tiar.
ïa kine ki tiar ba shna da ki nongshna tiar tynrai yn buh ruh ha ka Government e Marketplace (GeM) khnang ba kin kham ïaid ïew bad ula kyntu ïa ki bor pynïaid ha ka jylla ba kin kyntiew jingtip khnang ba ki briew kin kham tip shaphang kane ka skhim bad ba kin ïoh jingmyntoi.
